കൊച്ചി: തിയേറ്റർ ഉടമകളുടെ പുതിയ സംഘടന നിലവിൽ വന്നു. ചലച്ചിത്ര താരം ദിലീപും നിർമ്മാതാവ് ആന്റണി പെരുമ്പാവൂരുമാണ് സംഘടനയ്ക്ക് നേതൃത്വം നൽകുന്നത്. ഫിലിം എക്സിബിറ്റേഴ്സ് യുണൈറ്റഡ് ഓർഗനൈസേഷൻ ഓഫ് കേരള (FEUOK) എന്നാണ് പുതിയ സംഘടനയുടെ പേര്. ലിബർട്ടി ബഷീർ പ്രസിഡന്റായ സിനി എക്സിബിറ്റേഴ്സ് ഫെഡറേഷന് ബദലായാണ് പുതിയ സംഘടന.
സംഘടനയുടെ പ്രസിഡന്റ് ദിലീപ് തന്നെയാണ്. ആന്റണി പെരുമ്പാവൂരാണ് വൈസ് പ്രസിഡന്റ്. ജനറല് സെക്രട്ടറി ബോബിയാണ്.
സിനിമ നിൽക്കാൻ പാടില്ലെന്നും അത് ചലിച്ചു കൊണ്ടേയിരിക്കണമെന്നും ഇനി കേരളത്തിൽ തീയറ്റർ സമരം ഉണ്ടായിരിക്കില്ലെന്നും ദിലീപ് പറഞ്ഞു. എല്ലാവരെയും ഉൾപ്പെടുത്തിയാണ് പുതിയ സംഘടന തുടങ്ങിയിരിക്കുന്നത്.
മമ്മുട്ടിയും മോഹൻലാലും അടക്കമുള്ളവരുടെ ആശിർവാദം പുതിയ സംഘടനയ്ക്കുണ്ട്. ഏതെങ്കിലും തീയറ്ററുടമകളോട് നിഷേധാത്മക സമീപം പുതിയ സംഘടന സ്വീകരിക്കില്ല. പുതിയ സംഘടനയാകും ഇനി റിലീസ് കാര്യങ്ങൾ തീരുമാനിക്കുക എന്നും ദിലീപ് പറഞ്ഞു.
