ഇന്ന് ലോകാരോഗ്യദിനം. വിവിധ ആരോഗ്യ പ്രശ്നങ്ങളെക്കുറിച്ച് ജനങ്ങളെ ബോധവാന്മാരാക്കുകയും ആരോഗ്യപൂർണ്ണമായ ജീവിതം നയിക്കാൻ അവരെ പ്രാപ്തരാക്കുകയുമാണ് ഈ ദിനത്തിന്റെ ലക്ഷ്യം. ഡിപ്രഷൻ അഥവാ വിഷാദരോഗത്തിനെതിരെയുള്ള ബോധവത്കരണമാണ് ഇത്തവണത്തെ ലോകാരാഗ്യദിനത്തിന്റെ പ്രധാന സന്ദേശം.
1948 ൽ ലോകാരോഗ്യസംഘടന ഒരു ലോകാരോഗ്യ അസംബ്ലി സംഘടിപ്പിക്കുകയുണ്ടായി. അവിടെ ഉയർന്ന ആശയമായിരുന്നു എല്ലാ വർഷവും ലോകാരോഗ്യദിനമായി ഒരു ദിവസം ആചരിക്കുക എന്നത്. അങ്ങനെ 1950 മുതൽ എല്ലാ വർഷവും ഏപ്രിൽ 7 ലോകാരോഗ്യദിനമായി ആചരിച്ചുവരുന്നു. വിവിധങ്ങളായ ആരോഗ്യപ്രശ്നങ്ങളെക്കുറിച്ച് ലോകമെമ്പാടും ജനങ്ങളെ ബോധവത്കരിക്കുക എന്ന ലക്ഷ്യത്തോടെ നിരവധി പ്രവർത്തനങ്ങൾ ആശുപത്രികളും ആതുരശുശ്രൂഷാലയങ്ങളും കേരീകരിച്ച് ഈ ദിവസം നടന്നുവരുന്നു.
ഡിപ്രഷൻ അഥവാ വിഷാദരോഗത്തിനെതിരായ ബോധവത്കരണമാണ് ഇത്തവണത്തെ ലക്ഷ്യം. വിഷാദത്തിനടിമപ്പെടുന്നവരുടെ എണ്ണം ലോകത്ത് കൂടി വരുന്നുവെന്ന റിപ്പോർട്ടിനെ തുടർന്നാണ് ഇത്തവണ ഇത് മുഖ്യവിഷയമാക്കിയത്. വിഷാദരോഗം പ്രായഭേദമന്യേ എല്ലാത്തരം ആളുകളിലും പിടിപെടാറുണ്ട്. ജീവിതസാഹചര്യങ്ങളിലുണ്ടാകുന്ന മാറ്റവും മറ്റും ഇതിന് കാരണമാണ്. ഫലപ്രദമായ ബോധവത്കരണം ഈ രോഗനിയന്ത്രണത്തിന് അനിവാര്യമാണ്. അതുകൊണ്ടാണ് വിഷാദ രോഗ നിയന്ത്രണം ഇത്തവണത്തെ ലോകാരോഗ്യദിന സന്ദേശമാക്കിയത് .
