തിയേറ്ററുകളിൽ ചിരിയുടെ അമിട്ട് പൊട്ടിക്കാൻ ‘അങ്കരാജ്യത്തെ ജിമ്മൻമാർ’ നാളെ എത്തും. പരസ്യ ചിത്രങ്ങളിലൂടെ ശ്രദ്ധേയനായ നവാഗതനായ പ്രവീൺ നാരായൺ തിരക്കഥയെഴുതി സംവിധാന ചെയ്യുന്ന ചിത്രത്തിൽ രൂപേഷ് പീതാംബരൻ, രാജീവ് പിള്ള, ഡോ. റോണി ഡേവിഡ്, അനു മോഹൻ, സുദേവ് നായർ, മെറീന മൈക്കിൾ, വിനീത കോശി എന്നിവരാണ് പ്രധാന വേഷങ്ങളിലെത്തുന്നത്.
പേരിൽ പുതുമയുമായെത്തുന്ന ചിത്രത്തിലെ ഗാനങ്ങളും ടീസറുകളും ഇതിനോടകം തന്നെ സാമൂഹ്യമാദ്ധ്യമങ്ങളിൽ തരംഗമായിക്കഴിഞ്ഞു. ചിത്രത്തിന്റെ ആദ്യടീസറിൽ രൂപേഷ് ആടുതോമയായി എത്തിയിരുന്നു. ഇത് ഏറെ കയ്യടി നേടി.
നവമാദ്ധ്യമങ്ങളിലൂടെ ശ്രദ്ധേയനായ യുവഗായകൻ വൈഷ്ണവ് ഗിരീഷ് ആദ്യമായി മലയാളത്തിൽ പാടുന്നു എന്ന പ്രത്യേകതയും ജിമ്മൻമാർക്കുണ്ട്. ചിത്രത്തിലെ രണ്ട് പാട്ടുകളാണ് ഇപ്പോൾ പുറത്തിറങ്ങിയിരിക്കുന്നത്. ഹരിഹരനും നിഖിതയും ആലപിച്ച പ്രണയഗാനവും വൈഷ്ണവ് ഗിരീഷ് പാടി അഭിനയിച്ച പ്രൊമോ സോംഗുമാണ് ഇവ. സംസ്ഥാന അവാർഡ് ജേതാവായ ഒഎസ് ഉണ്ണികൃഷ്ണന്റെ വരികൾക്ക് ഗിരീഷ് നാരായണനാണ് ഈണം പകർന്നിരിക്കുന്നത്.
DQ ഫിലിംസ് നിർമിക്കുന്ന ചിത്രത്തിന്റെ ഛായാഗ്രഹണം പ്രശസ്ത ക്യാമറാമാൻ സുജിത് വാസുദേവിനോടൊപ്പം അസ്സോസിയേറ്റ് ആയിരുന്ന ജിക്കു ജേക്കബ് പീറ്റർ ആണ് നിർവഹിക്കുന്നത്.
