ബംഗലുരു: ഐ.പി.എല്ലില്‍ ഈ സീസണിലെ ആദ്യ ജയം തേടി റോയല്‍ ചലഞ്ചേഴ്‌സ് ബാംഗ്‌ളൂര്‍ ഇന്നിറങ്ങും. രാത്രി എട്ടിന് ബെംഗലൂരുവില്‍ നടക്കുന്ന മത്സരത്തില്‍ കിംഗ്‌സ് ഇലവന്‍ പഞ്ചാബാണ് ബാംഗ്‌ളൂരിന്റെ എതിരാളികള്‍.
കരുത്തുറ്റനിരയെ അണി നിരത്തിയ റോയല്‍ ചലഞ്ചേഴ്‌സ് ബാംഗ്‌ളൂരിന് ഈ സീസണിലെ അവരുടെ ആദ്യ മത്സരത്തില്‍ കൊല്‍ക്കത്ത നൈറ്റ് റൈഡേഴ്‌സില്‍ നിന്നും തോല്‍വി നേരിട്ടിരുന്നു. മോശമല്ലാത്ത സ്‌കോര്‍ കണ്ടെത്തിയിട്ടും സുനില്‍ നരേന്റെ വെടിക്കെട്ട് ബാറ്റിംഗാണ് ബാംഗ്‌ളൂരിന് തിരിച്ചടിയായത്. ബ്രണ്ടന്‍ മക്കല്ലവും എ.ബി.ഡിവിലിയേഴ്‌സും വിരാട് കോഹ്ലിയും അടങ്ങുന്ന അതിസമ്പന്നമായായ ബാറ്റിംഗ് നിരയുടെ ധാരാളിത്തമാണ് അവരുടെ കരുത്ത്. യുസ്‌വേന്ദ്ര ചാഹല്‍, ക്രിസ് വോക്‌സ്, വിഷിങ്ടണ്‍ സുന്ദര്‍, ഉമേഷ് യാദവ് എന്നിവരങ്ങിയ ബൗളിംഗ് നിരയുടെ ആക്രമണത്തിന് മൂര്‍ച്ച കൂട്ടേണ്ടിയിരിക്കുന്നു.
മറുവശത്ത് ഡല്‍ഹി ഡെയര്‍ ഡെവിള്‍സിനെതിരേ അനായാസ ജയം നേടിയ ആത്മവിശ്വാസത്തിലാണ് കിംഗ്‌സ് ഇലവന്‍ പഞ്ചാബ്. 14 പന്തില്‍ അര്‍ദ്ധസെഞ്ച്വറി നേടിയ ലോകേഷ് രാഹുലിന് കഴിഞ്ഞ മത്സരത്തിലെ ഫോം നിലനിര്‍ത്താന്‍ സാധിച്ചാല്‍ പഞ്ചാബിനെ പിടിച്ചു കെട്ടുക ബുദ്ധിമുട്ടായിരിക്കും. മായങ്ക് അഗര്‍വാള്‍, കരുണ്‍നായര്‍, ഡേവിഡ് മില്ലര്‍, സറ്റോയിനിസ് എന്നിവര്‍ മികച്ച ഫോമിലാണ്. ക്യാപ്റ്റന്‍ ആര്‍.അശ്വിനും മോഹിത് ശര്‍മ്മയും മുജീബ് ഉര്‍ റഹ്മാനും കഴിഞ്ഞ മത്സരത്തില്‍ പുലര്‍ത്തിയ മികവ് തുടര്‍ന്നാല്‍ ബാംഗ്‌ളൂരിന് കാര്യങ്ങള്‍ എളുപ്പമാവില്ല.
