ഡൽഹി : ചന്ദ്രനിൽ ചെന്നാലും വേറെ മലയാളിയുണ്ടോയെന്ന് അന്വേഷിക്കൽ മലയാളികളുടെ പൊതു സ്വഭാവമാണല്ലോ. പിന്നെ അസോസിയേഷനായി , ആഘോഷമായി , തമ്മിൽ പാരയായി.
ഐപിഎല്ലിലുമുണ്ട് മലയാളി താരങ്ങൾ . കേരളത്തിനു കളിക്കുന്ന സഞ്ജുവും ബേസിൽ തമ്പിയും നിധീഷും ആസിഫും സച്ചിൻ ബേബിയും മാത്രമല്ല മലയാളികളായ ശ്രേയസ് അയ്യരും കർൺ നായരുമെല്ലാം ഐപിഎല്ലിൽ വരവറിയിച്ചവരാണ്.
ഇന്നലെ നടന്ന സൺ റൈസേഴ്സും രാജസ്ഥാന്‍ റോയല്‍സുമായുള്ള മത്സരത്തിലാണ് ഒരു മലയാളി പോരാട്ടം നടന്നത് .സണ്‍റെെസേഴ്സിനു വേണ്ടി പന്തെറിയുന്നത് പെരുമ്പാവൂർക്കാരനായ ബേസിൽ തമ്പി .ബാറ്റു ചെയ്യുന്നത് തിരുവനന്തപുരത്തു നിന്നുള്ള താരം സഞ്ജു സാംസണും.
ആദ്യ പന്ത് മനോഹരമായ സ്ക്വയർ ഡ്രൈവിലൂടെ ബൗണ്ടറിയിലേക്ക് പായിച്ചു സഞ്ജു. അടുത്ത പന്ത് ബേസിൽ തമ്പി എറിഞ്ഞത് പേസ് കുറച്ച്. എന്നാൽ പന്തിന്റെ വേഗത കൃത്യമായി കണക്കു കൂട്ടിയ സഞ്ജു അത് ഡീപ് മിഡ് വിക്കറ്റിലേക്ക് സിക്സറിനു തൂക്കി. ഒരു പന്തിനു ശേഷം വീണ്ടും സഞ്ജു സ്ക്വയർലെഗ്ഗിലേക്ക് ഒരു ബൗണ്ടറി കൂടി നേടി.
എന്നാൽ അവസാന ഓവർ എറിഞ്ഞ് ടീമിനു ജയം നേടിക്കൊടുത്തത് ബേസിലായിരുന്നു. 21 റൺസ് ആയിരുന്നു അവസാന ഓവറിൽ ജയിക്കാൻ രാജസ്ഥാന്‍ റോയല്‍സിനു വേണ്ടിയിരുന്നത്.എന്നാൽ പത്തു റൺസ് മാത്രം വിട്ടു കൊടുത്ത് ബേസിൽ തമ്പി വിജയം സൺറൈസേഴ്സിന്റേതാക്കി.
