ന്യൂഡൽഹി: ഐപിഎല്ലിൽ ഇന്ന് നടക്കുന്ന മത്സരത്തിൽ ഡൽഹി ഡെയർ ഡെവിൾസും രാജസ്ഥാൻ റോയൽസും നേർക്കുനേർ. ഡൽഹിയിൽ രാത്രി എട്ടിനാണ് മത്സരം.
കളിച്ച ഏഴ് മത്സരങ്ങളിൽ മൂന്നെണ്ണം ജയിച്ച രാജസ്ഥാൻ റോയൽസിന് ഇനിയങ്ങോട്ട് ഇതുവരെ പുറത്തെടുത്ത പ്രകടനം പോരാ. കൂടുതൽ ഒത്തിണക്കവും സ്ഥിരതയും അനിവാര്യം. മികച്ച തുടക്കം ലഭിച്ച ശേഷം അലസമായ ഷോട്ടുകളിൽ വിക്കറ്റ് വലിച്ചെറിയാതെ ഇന്നിംഗ്സിന്റെ അവസാനം വരെ കളിക്കാൻ സഞ്ജു ശ്രമിക്കണം. നായകൻ അജിങ്ക്യ രഹാനെ നിലയുറപ്പിച്ച ശേഷവും സ്കോറിംഗ് നരക്ക് ഉയർത്തുന്നില്ല എന്നത് പോരായ്മയാണ്.
പുതുരക്തത്തിന്റെ കരുത്തിലിറങ്ങുന്ന ഡൽഹിയാകട്ടെ കുറേ കൂടി പക്വമായ സമീപനം സ്വീകരിച്ച് ബാറ്റിംഗിലെ കരുത്ത് വിനിയോഗിക്കേണ്ടിയിരിക്കുന്നു. പ്രിഥ്വി ഷാ, ശ്രേയസ്സ് അയ്യർ, റിഷഭ് പന്ത്, മാക്സ്വെൽ, മൺറോ എന്നിവർ മികവിലേക്കുയർന്നാൽ എതിരാളികൾക്ക് കാര്യങ്ങൾ ദുഷ്കരമാവും.
മോശമല്ലാത്ത ബൗളിംഗ് നിരയെ ശരിയായി വിനിയോഗിക്കാൻ നായകന് സാധിച്ചാൽ മികച്ച ഫലം ലഭിക്കുമെന്ന കാര്യത്തിൽ സംശയം വേണ്ട.
സീസണിൽ ആദ്യ മത്സരത്തിൽ ഏറ്റുമുട്ടിയപ്പോൾ ജയം രാജസ്ഥാനൊപ്പമായിരുന്നു. മഴ കളിമുടക്കിയ മത്സരത്തിൽ ഡെക്ക് വർത്ത് ലൂയിസ് നിയമപ്രകാരമായിരുന്നു രാജസ്ഥാന്റെ ജയം.
