കൊല്ക്കത്ത: ശക്തമായ തിരിച്ചുവരവ് നടത്തുന്ന മുംബൈ ഇന്ത്യന്സ് ഇന്ന് കൊല്ക്കത്ത നൈറ്റ് റൈഡേഴ്സിനെ നേരിടും. ഇന്ന് ജയിക്കാനായാല് മുംബൈക്ക് പ്ലേ ഓഫ് സാധ്യത ശക്തമായി നിലനിര്ത്താന് സാധിക്കും. കൊല്ക്കത്തയില് രാത്രി എട്ടിനാണ് മത്സരം.
അടിമുടി മാറിയാണ് മുംബൈ ഇന്ത്യന്സ് ഇപ്പോള് കളിക്കളത്തിലിറങ്ങുന്നത്. ഒടുവില് കളിച്ച നാല് മത്സരങ്ങളില് മൂന്നും ജയിച്ച മുംബൈ ഇന്ത്യന്സിന്റെ ബാറ്റിംഗും ബൗളിംഗും ഫീല്ഡിംഗും മെച്ചപ്പെട്ടിരിക്കുന്നു. കഴിഞ്ഞ മത്സരത്തില് കൊല്ക്കത്തയെ തോല്പ്പിച്ചതിന്റെ ആത്മവിശ്വാസവും അവര്ക്കുണ്ട്. ബൗളിംഗില് ബുമ്രയും ക്രുണാല് പാണ്ഡ്യയ്ക്കും ഒപ്പം ഹാര്ദ്ദിക് പാണ്ഡ്യ കൂടി ഫോമിലേക്ക് ഉയരുകയും മക്ളിനാഗനും മായങ്ക് മാര്ഖണ്ഡെയും മികച്ച പ്രകടനം പുറത്തെടുക്കുകയും ചെയ്തതോടെ മുംബൈ കരുത്താര്ജ്ജിച്ചിരിക്കുകയാണെന്ന് തന്നെ പറയാം.
അവസാന ഓവറുകളില് കൂടുതല് റണ് വഴങ്ങുന്നത് ഒരു പരിധിവരെ തടയാന് കഴിയുന്നത് മുംബൈയുടെ വിജയ വഴിയിലേക്കുള്ള മടങ്ങലിന് കാരണമായിട്ടുണ്ട്. ബാറ്റിംഗില് സൂര്യകുമാര് യാദവ്, എവിന് ലെവിസ്, പാണ്ഡ്യ സഹോദരന്മാര് എന്നിവര് മികവ് തുടരുന്നു.
മറുവശത്ത് മികച്ച ഓള്റൗണ്ട് ടീമാണെങ്കിലും മധ്യ ഓവറുകളില് ബാറ്റിംഗ് മന്ദഗതിയിലാവുന്നത് കൊല്ക്കത്തയുടെ പോരായ്മയാണ്. ബാറ്റിംഗ് ഓര്ഡറില് അനാവശ്യ പരീക്ഷണം ഒഴിവാക്കണം. ശുഭ്മാന് ഗില് മധ്യനിരയ്ക്ക് കരുത്താണ്. സുനില് നരേന്റെ ഓള്റൗണ്ട് മികവും ടീമിന് ബോണസാണ്. എങ്കിലും, ആത്മവിശ്വാസം തിരികെ പിടിച്ച മുംബൈ ഇന്ത്യന്സിനെ വീഴ്ത്താന് വ്യക്തമായ ആസൂത്രണം അനിവാര്യം.