ന്യൂഡൽഹി: ഐപിഎല്ലിൽ ഇന്ന് സൺറൈസേഴ്സ് ഹൈദരാബാദ്, ഡൽഹി ഡേയർഡെവിൾസിനെ നേരിടും. ശക്തരായ സൺറൈസേഴ്സിനെ നേരിടാൻ കളിയുടെ എല്ലാ മേഖലകളിലും ഡൽഹി ഏറെ മുന്നോട്ടുപോകണം. ഡൽഹിയിൽ രാത്രി എട്ടിനാണ് മത്സരം.
ഏറ്റവും മികച്ച പ്രകടനത്തോടെ പോയിന്റ് പട്ടികയിൽ മുന്നിൽ തുടരുന്ന സൺറൈസേഴ്സ് ഹൈദരാബാദിനെ മറികടക്കാൻ ഡൽഹി ഡെയർ ഡെവിൾസിന് ഏറ്റവും മികച്ച പ്രകടനം തന്നെ പുറത്തെടുക്കണം. യുവതാരങ്ങളുടെ കരുത്തിലിറങ്ങുന്ന ഡൽഹിയുടെ പ്രതീക്ഷ പ്രിഥ്വി ഷാ, ഋഷഭ് പന്ത്, ശ്രേയസ്സ് അയ്യർ എന്നിവരിലാണ്. എന്നാൽ ഇവർക്ക് മറ്റ് ബാറ്റ്സ്മാൻമാരിൽ നിന്ന് കാര്യമായ പിന്തുണ ലഭിക്കാത്തത് വെല്ലുവിളിയാണ്.
കൂടാതെ, ബൗളർമാരുടെ സ്ഥിരതയില്ലായ്മയും ടീമിന് തലവേദനയാവുന്നുണ്ട്. ഇതുവരെ കളിച്ച 10 മത്സരങ്ങളിൽ മൂന്നെണ്ണം മാത്രം ജയിച്ച് ഏറ്റവും പിന്നിലാണ് ഡൽഹി.
മറുവശത്ത് സൺറൈസേഴ്സ് ഹൈദരാബാദാകട്ടെ ഏറ്റവും സ്ഥിരതയുള്ള പ്രകടനവുമായി മുന്നേറുകയാണ്. ബൗളിംഗിന്റെ കരുത്തിലായിരുന്നു തുടക്കത്തിലെ കുതിപ്പെങ്കിൽ, ഇപ്പോൾ ബാറ്റ്സ്മാൻമാരും മികവിലേക്ക് ഉയർന്നിട്ടുണ്ട്. ക്യാപ്റ്റൻ കെയിൻ വില്യംസൺ തന്നെയാണ് വിശ്വസ്തൻ. ശിഖർ ധവാനും അലക്സ് ഹെയിൽസും മനീഷ് പാണ്ഡേയും യൂസഫ് പഠാനും മോശമല്ലാത്ത പ്രകടനം പുറത്തെടുക്കുന്നുണ്ട്.
ഈ മികവ് നിലനിർത്താനായാൽ സൺറൈസേഴ്സിന് കാര്യങ്ങൾ എളുപ്പമാവും.