ജയ്പൂര്‍: ഐപിഎല്ലില്‍ ചെന്നൈ സൂപ്പര്‍ കിംഗ്‌സിനെതിരെ തകര്‍പ്പന്‍ ജയത്തോടെ രാജസ്ഥാന് റോയല്‍സ് പ്ലേ ഓഫ് സാധ്യത നിലനിര്‍ത്തി. 177 റണ്‍സ് വിജയലക്ഷ്യം ഒരു പന്തു ശേഷിക്കെ ആറു വിക്കറ്റ് നഷ്ടത്തില്‍ രാജസ്ഥാന് മറികടന്നു. 60 പന്തില്‍ 95 റണ്‍സെടുത്ത ജോസ് ബട്‌ലറാണ് രാജസ്ഥാനെ ജയത്തിലെത്തിച്ചത്.
വിജയലക്ഷ്യത്തിലേക്ക് ബാറ്റു വീശിയ രാജസ്ഥാന് ജോസ് ബട്‌ലറും ബെന്‍ സ്റ്റോക്‌സും ചേര്‍ന്ന് മികച്ച തുടക്കമാണ് നല്‍കിയത്. 4 ഓവറില്‍ 48 റണ്‍സ് എടുത്തു നില്‍ക്കെ 11 റണ്‍സുമായി സ്റ്റോക്‌സ് മടങ്ങി. അജിങ്ക്യാ രഹാനയെ നാലു റണ്‍സിന് ജഡേജ മടക്കിയപ്പോള്‍ ബട്‌ലറിന് തുണയായത് സഞ്ജു വി സാംസണ്‍. 21 റണ്‍സെടുത്ത് നില്‍ക്കെ സഞ്ജു റണ്ണൗട്ടായി. തുടരെ വിക്കറ്റുകള്‍ നഷ്ടമായെങ്കിലും ബട്‌ലര്‍ ഒരറ്റത്ത് പട നയിച്ചു. 60 പന്തില്‍ രണ്ട് സിക്‌സും 11 ഫോറും ഉള്‍പ്പെട്ട മികച്ച ഇന്നിംഗ്‌സ്. 17 പന്തില്‍ 22 റണ്‍സ് എടുത്ത സ്റ്റുവര്‍ട്ട് ബിന്നിയും നാലു പന്തില്‍ 13 റണ്‍സ് എടുത്ത ഗൗതമും ബട്‌ലര്‍ക്ക് മികച്ച പിന്തുണ നല്‍കി
ആദ്യം ബാറ്റ് ചെയ്ത ചെന്നൈ നാലു വിക്കറ്റ് നഷ്ടത്തിലാണ് 176 റണ്‍സ് എടുത്തത്. സുരേഷ് റെയ്‌ന 52 ഉം ഷെയ്ന്‍ വാട്‌സന്‍ 39ഉം ധോണി 33ഉം റണ്‍സ് എടുത്തു
