പൂനെ : കളിക്കളത്തിൽ ക്യാപ്ടൻ കൂൾ എന്നറിയപ്പെടുന്നയാളാണ് മുൻ ഇന്ത്യൻ ക്യാപ്ടനും ചെന്നൈ നായകനുമായ മഹേന്ദ്രസിംഗ് ധോണി . ബാറ്റ് ചെയ്യാൻ വരുമ്പോഴും ഔട്ടായി പോകുമ്പോഴും സാധാരണ ഒരേ ഭാവമാണ് ധോണിക്ക്. സെഞ്ച്വറിയടിച്ചാലും വലിയ ആവേശമൊന്നും കാണിക്കാറില്ല. കളിക്കളത്തിലെ തമാശയിലും ക്യാപ്ടൻ കൂളിനെ സാധാരണയായി കാണാനാകില്ല.
എന്നാൽ സൺറൈസേഴ്സ് ഹൈദരാബാദ് ബാറ്റ് ചെയ്യുന്നതിനിടെ ക്യാപ്ടൻ ധോണി രവീന്ദ്ര ജഡേജയെ പേടിപ്പിക്കാൻ ശ്രമിച്ചത് കളിക്കളത്തിൽ ചിരി പടർത്തി. ഏഴാമത്തെ ഓവറിലായിരുന്ന കമന്റേറ്റർമാരെയും കാണികളേയും ഒരു പോലെ ചിരിപ്പിച്ച സംഭവം.
മിഡോണിലേക്ക് പന്ത് തട്ടിയിട്ട് ബാറ്റ്സ്മാൻ സിംഗിളിനോടിയപ്പോൾ കീപ്പിംഗ് സ്ഥലത്തു നിന്ന് ഓടിപ്പോയി ഫീൽഡ് ചെയ്തത് ധോണിയായിരുന്നു. പന്തെടുത്തയുടൻ പന്തിനു നേരേ പാഞ്ഞു വരുന്ന ജഡേജയെയാണ് കണ്ടത് . എങ്കിൽ പിന്നെ ഒന്ന് ഞെട്ടിക്കാമെന്ന് കരുതി . പന്ത് ജഡേജയുടെ നേരേ എറിയുന്നതായി ഭാവിച്ചു. കളിയായിട്ടാണെങ്കിലും പേടിക്കുന്നതായി ജഡേജയും അഭിനയിച്ചതോടെ കളിക്കളത്തിൽ ചിരി പടർന്നു.
