തിരുവനന്തപുരം: കെവിന്റെ കൊലപാതകവുമായി ബന്ധപ്പെട്ട് എഎസ്ഐ ബിജുവിനെ സസ്പെന്റ് ചെയ്തു. രാത്രി പട്രോളിംഗിനുണ്ടായിരുന്ന പൊലീസ് ജീപ്പ് ഡ്രൈവറെയും അന്വേഷണ വിധേയമായി സസ്പെന്റ് ചെയ്തിട്ടുണ്ട്. ഐജി വിജയ് സാഖറെയാണ് ഇരുവര്ക്കുമെതിരെ നടപടി എടുത്തത്.
കെവിനെ തട്ടിക്കൊണ്ടു പോയ അന്നു രാത്രി പട്രോളിംഗിനിടെ ഷാനുവിനെയും കൂട്ടരെയും സംഘം കണ്ടിരുന്നു. ഇവരെ രാത്രി ചോദ്യം ചെയ്ത ശേഷം വിട്ടയക്കുകയായിരുന്നു.
കെവിനെ തട്ടിക്കൊണ്ടു പോയത് പൊലീസിന്റെ അറിവോടെ തന്നെയെന്ന് വ്യക്തമാക്കി ഐജിയുടെ അന്വേഷണ റിപ്പോര്ട്ട് പുറത്തു വന്നതിനു പിന്നാലെയാണ് ഇവര്ക്കെതിരെ നടപടിയെടുത്തത്. ഗാന്ധിനഗര് എഎസ്ഐ ബിജു കേസ് അട്ടിമറിച്ചെന്നാണ് റിപ്പോര്ട്ടിലെ കണ്ടെത്തല്. തട്ടിക്കൊണ്ടു പോയ ഉടന് തന്നെ ഈ വിവരം എഎസ്ഐ അറിഞ്ഞിരുന്നു.
പ്രതികളുമായി എഎസ്ഐ ബിജു രണ്ടു തവണ ഫോണില് സംസാരിച്ചു. ആറ് മണിക്ക് ഇരുവരും തമ്മില് സംസാരിച്ചപ്പോള് കെവിന് രക്ഷപെട്ടതായി ഷാനു പറഞ്ഞു. ബിജു തന്നെയാണ് ഈ വിഷയം പൂഴ്ത്തിവച്ചത്. ഇങ്ങനെ ഒരു സംഭവം ഉണ്ടായിട്ടും ഉന്നത ഉദ്യോഗസ്ഥരെ വിവരം അറിയിച്ചില്ല. വിഷയത്തിന്റെ ഗൗരവം മനസിലാക്കാതെ ഇതിനെ ഒരു കുടുംബപ്രശ്നമാക്കി മാറ്റാനാണ് ശ്രമിച്ചത്. എസ് ഐ ഷിബു വിവരം അറിയുന്നത് ഞായറാഴ്ച രാവിലെ ഒമ്പത് മണിക്കാണെന്നും റിപ്പോര്ട്ടില് പറയുന്നു.