മോസ്കോ: ലോകകപ്പിൽ നിലവിലെ ചാമ്പ്യൻമാരായ ജർമ്മനിയും മുൻ ജേതാക്കളായ ബ്രസീലും ഇന്നിറങ്ങുന്നു. ബ്രസീലിന് -സ്വിറ്റ്സർലൻഡും, ജർമ്മനിക്ക് – മെക്സിക്കോയുമാണ് എതിരാളികൾ.
ലോകകപ്പിൽ ഇന്ന് മൂന്ന് മത്സരങ്ങൾ. കോസ്റ്റാറിക്കയും സെർബിയയും തമ്മിലാണ് ഇന്നത്തെ ആദ്യ മത്സരം. വൈകിട്ട് 5.30നാണ് കളി. അടുത്തിടെ കളിച്ച സൗഹൃദ മത്സരങ്ങളിൽ പ്രകടനം മോശമായിരുന്നെങ്കിലും 2014 ലോകകപ്പിൽ ക്വാർട്ടറിലെത്തിയ ചരിത്രം അവർക്കുണ്ട്. മറുവശത്ത് യൂറോപ്യൻ യോഗ്യതാ റൗണ്ടിലെ ഗ്രൂപ്പ് ഡിയിൽ ഒന്നാമതെത്തിയ ടീമാണ് സെർബിയ.
കഴിഞ്ഞ പ്രാവശ്യത്തെ ചാമ്പ്യൻമാരായ ജർമ്മനി ഇന്ന് അവരുടെ ആദ്യ മത്സരത്തിൽ മെക്സിക്കോയെ നേരിടും. രാത്രി 8.30ന് മോസ്കോയിലെ ലുഷ്നിക്കി സ്റ്റേഡിയത്തിലാണ് മത്സരം. യോഗ്യതാ റൗണ്ടിലെ പത്ത് മത്സരവും ജയിച്ച് മികച്ച പ്രകടനത്തോടെയാണ് ജർമ്മനി റഷ്യയിലേക്ക് യോഗ്യത നേടിയത്. 10 മത്സരത്തിൽ 43 ഗോളുകൾ അടിച്ചുകൂട്ടിയപ്പോൾ വഴങ്ങിയത് നാലെണ്ണം മാത്രം.
മറുവശത്ത് മെക്സിക്കോ യോഗ്യതാ റൗണ്ടിൽ കളിച്ച 16 മത്സരങ്ങളിൽ ഒരെണ്ണം മാത്രമാണ് തോറ്റത്. കഴിഞ്ഞ വർഷം ഫിഫ കോൺഫെഡറേഷൻസ് കപ്പ് നേടിയ ജർമ്മനിക്കാണ് മത്സരത്തിൽ മുൻതൂക്കം.
ഇന്ന് രാത്രി 11.30നാണ് ബ്രസീലിന്‍റെ ആദ്യ മത്സരം. റോസ്തോവ് എരീനയിൽ നടക്കുന്ന മത്സരത്തിൽ സ്വിറ്റ്സർലൻഡാണ് എതിരാളികൾ. കഴിഞ്ഞ ലോകകപ്പിന്‍റെ സെമിയിൽ ജർമ്മനിയിൽ നിന്നേറ്റ ഞെട്ടിപ്പിക്കുന്ന വമ്പൻതോൽവിക്കുശേഷമുള്ള ബ്രസീലിന്‍റെ വലിയ വേദിയിലെ ആദ്യ മത്സരമാണിത്.
എന്നാൽ ടിറ്റെയുടെ കീഴിൽ വീഴ്ചകൾ മറന്ന് പോരാട്ടവീര്യം വീണ്ടെടുത്ത ബ്രസീൽ മികച്ച ഫോമിലാണ്.
