ആരാധകർ ആകാംക്ഷയോടെ കാത്തിരിക്കുന്ന മോഹൻലാൽ- പൃഥ്വിരാജ്- മുരളീ ഗോപി കൂട്ടുകെട്ടിലൊരുങ്ങുന്ന ചിത്രം ലൂസിഫറിന്റെ ഫസ്റ്റ് ലുക്ക് പുറത്തിറങ്ങി. മോഹൻലാൽ മീശപിരിച്ച് കലിപ്പ് ലുക്കിൽ നിൽക്കുന്ന പോസ്റ്റർ ലാലേട്ടൻ തന്നെയാണ് ഫേസ്ബുക്ക് വഴി പുറത്തിറക്കിയത്. ചിത്രത്തിന്റെ പൂജ കഴിഞ്ഞ ദിവസം കഴിഞ്ഞിരുന്നു.
ചിത്രത്തിൽ മോഹൻലാലിന്റെ ലുക്ക് എങ്ങനെയാകും എന്ന ആകാംക്ഷയിലായിരുന്നു ആരാധകർ. ഈ കാത്തിരിപ്പിന് വിരാമമിട്ടുകൊണ്ടാണ് ഇപ്പോൾ ഫസ്റ്റ് ലുക്ക് പുറത്തിറങ്ങിയത്. നേരത്തെ മോഹന്ലാൽ കറുത്ത കരയുള്ള മുണ്ടുടുത്ത് കാലിന്മേല് കാല് കയറ്റി വച്ചിരിക്കുന്ന പോസ്റ്റർ പുറത്തിറങ്ങിയിരുന്നു.
Lucifer First Look
Posted by Mohanlal on Thursday, July 19, 2018
പൃഥ്വിരാജിന്റെ കന്നി സംവിധാന സംരംഭമായ ലൂസിഫറിൽ മോഹൻലാൽ നായകനാകും. നടൻ മുരളീ ഗോപിയാണ് ചിത്രത്തിന്റെ രചന. ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂരാണ് ചിത്രം നിർമ്മിക്കുന്നത്.
സുകുമാരന്റെയും ഭരത് ഗോപിയുടെയും മക്കൾ ഒന്നിക്കുന്ന ചിത്രത്തിൽ പ്രവർത്തിക്കാൻ കഴിയുന്നതിന്റെ സന്തോഷം മോഹൻലാൽ മുൻപ് പങ്കുവെച്ചിരുന്നു. മോഹൻലാലിനായി എഴുതുകയെന്നത് തന്റെ സ്വപ്നമായിരുന്നുവെന്നും തന്റെ സ്വപ്ന പ്രോജക്റ്റാണ് ലൂസിഫറെന്നും മുരളീ ഗോപിയും പ്രതികരിച്ചിരുന്നു.
