വയനാട്: രഞ്ജി ട്രോഫി ക്രിക്കറ്റില് പുതുചരിത്രം നേടി കേരളം. ക്വാര്ട്ടര് ഫൈനലില് ഗുജറാത്തിനെ തകര്ത്താണ് ചരിത്രത്തിലാദ്യമായി കേരളം സെമിയില് കടന്നത്. ആവേശപ്പോരാട്ടത്തില് 113 റണ്സിനാണ് കേരളത്തിന്റെ ജയം. 195 റണ്സ് വിജയലക്ഷ്യവുമായി ബാറ്റിംഗിനിറങ്ങിയ ഗുജറാത്ത് 31.3 ഓവറില് 81 റണ്സിന് എല്ലാവരും പുറത്തായി. ബേസില് തമ്പിയും സന്ദീപ് വാര്യരുമാണ് കേരളത്തിന്റെ ജയത്തിന്റെ ചുക്കാന് പിടിച്ചത്. ബേസില് അഞ്ചും സന്ദീപ് നാലും വിക്കറ്റുകള് വീഴ്ത്തി. മത്സരത്തിലാകെ ബേസിലും സന്ദീപും എട്ട് വിക്കറ്റ് വീതം വീഴ്ത്തി. വിദര്ഭ-ഉത്തരാഖണ്ഡ് ക്വാര്ട്ടര് വിജയികളുമായിട്ടാണ് കേരളത്തിന്റെ സെമി പോരാട്ടം.
മത്സരത്തില് എട്ട് വിക്കറ്റ് വീഴ്ത്തിയതിന് പുറമെ ഒന്നാം ഇന്നിംഗ്സില് 33 പന്തില് അഞ്ച് ബൗണ്ടറിയും ഒരു സിക്സും സഹിതം 37 റണ്സെടുത്ത ബേസില് തമ്പിയാണ് കേരളത്തിന്റെ വിജയശില്പ്പികളില് പ്രധാനി. കഴിഞ്ഞ സീസണില് ക്വാര്ട്ടര് ഫൈനലില് കടന്ന കേരളം വിദര്ഭയോട് തോറ്റ് പുറത്താവുകയായിരുന്നു. കേരളത്തെ പരാജയപ്പെടുത്തിയ വിദര്ഭ സീസണില് രഞ്ജി ചാമ്പ്യന്മാരാവുകയും ചെയ്തു.
ഗുജറാത്ത് ടീമിന്റെ നായകന് പാര്ഥിന് പട്ടേല്, ഓപ്പണര് പ്രിയങ്ക് പാഞ്ചല്, ഇന്ത്യന് താരങ്ങളായ പീയുഷ് ചൗള, അക്ഷര് പട്ടേല് തുടങ്ങി പ്രഗത്ഭരുടെ നിര അണിനിരന്ന ഗുജറാത്തിനെ വീഴ്ത്തിയത് സെമിയില് കേരളത്തിന് വലിയ ആത്മവിശ്വാസം നല്കും. മൂന്നാമനായി ക്രീസിലെത്തിയ രാഹുല് ഷാ(33) മാത്രമാണ് കേരളത്തിന്റെ പേസര്മാരോട് ചെറുത്ത് നിന്നത്. ഷായ്ക്ക് പുറമെ ധ്രുവ് റാവലാണ്(17) ഗുജറാത്ത് ടീമില് രണ്ടക്കം പിന്നിട്ടത്.
