കോട്ടയം: മതേതര സര്ക്കാര് ഒരുകാരണവശാലും ക്ഷേത്രങ്ങളില് ഇടപെടരുതെന്ന് മുന് മിസോറാം ഗവര്ണര് കുമ്മനം രാജശേഖരന്. ശബരിമലയിലെ കാര്യങ്ങള് തീരുമാനിക്കേണ്ടത് ആചാര്യ ശ്രേഷ്ഠരും ഗുരുസ്വാമിമാരും ഭക്തജനങ്ങളും ആണ്. ശബരിമല വരും തലമുറയ്ക്ക് ഒരു പ്രചോദനം തന്നെയാണെന്നും കുമ്മനം രാജശേഖരന് പറഞ്ഞു. കോട്ടയം കൂരോപ്പട മാതൃമല ശ്രീ രാജരാജേശ്വരി ക്ഷേത്രത്തോട് അനുബന്ധിച്ചു നിര്മ്മിച്ച സ്വാഭിമാന കേന്ദ്രം ഉദ്ഘാടനം ചെയ്യുകയായിരുന്നു അദ്ദേഹം.
മിസോറാം ഗവര്ണര് സ്ഥാനം രാജിവച്ച് കേരളത്തിലെത്തിയ കുമ്മനം രാജശേഖരന് കഴിഞ്ഞ ദിവസം ശബരിമലയില് ദര്ശനത്തിനായി എത്തിയിരുന്നു. വ്യാഴാഴ്ച വൈകിട്ടോടെ പമ്പ സ്നാനം നടത്തി പിതൃക്കള്ക്ക് ബലി തര്പ്പണം നടത്തിയാണ് കുമ്മനം രാജശേഖരന് മല ചവിട്ടിയത്. തുടര്ന്ന് സന്നിധാനത്തെത്തിയ അദ്ദേഹം പടി പൂജയ്ക്ക് ശേഷമാണ് ദര്ശനം നടത്തിയത്.
ശബരിമലയെ ചരിത്രത്തില് ഇല്ലാത്ത വിവാദത്തില് കൊണ്ടെത്തിച്ച യുവതി പ്രവേശന വിഷയത്തില് ആചാര സംരക്ഷണത്തിനായി ഭക്തര്ക്കൊപ്പം നിലകൊള്ളുമെന്നും കുമ്മനം രാജശേഖരന് വ്യക്തമാക്കിയിരുന്നു. സന്നിധാനത്തു ദര്ശനം നടത്തിയ ശേഷം അദ്ദേഹം തന്ത്രിയെയും മേല്ശാന്തിയേയും സന്ദര്ശിച്ചു .കുമ്മനത്തെ പൊന്നാട അണിയിച്ചാണ് തന്ത്രി കണ്ഠരര് രാജീവരര് സ്വീകരിച്ചത്.