കൊച്ചി: നൈജീരിയൻ സെന്റർ ഫോർവേഡ് ബർത്ത് ലോമിയോ ഒഗ്ബേചെ കേരള ബ്ലാസ്റ്റേഴ്സുമായി കരാറിൽ ഒപ്പിട്ടു. കേരള ബ്ലാസ്റ്റേഴ്സ് കുടുംബത്തിൽ അംഗമാകാൻ കഴിഞ്ഞതിൽ ആഹ്ലാദമുണ്ടെന്നും വിശാലമായ ആരാധക വൃന്ദത്തിന്റെ പിന്തുണയോടെ വലിയ കാര്യങ്ങൾ ടീമിനൊപ്പം ചെയ്യാൻ കഴിയുമെന്നുള്ള ശുഭ പ്രതീക്ഷയാണുള്ളതെന്നും ഒഗ്ബേചെ പറഞ്ഞു.
നൈജീരിയയിലെ ഒഗോജയിൽ ജനിച്ച ഒഗ്ബേചെ ഫ്രാൻസ്, സ്പെയ്ൻ, ഇംഗ്ലണ്ട്, നെതർലൻഡ്സ്, ഗ്രീസ്, യുഎഇ തുടങ്ങിയ രാജ്യങ്ങളിലെ ക്ലബ്ബുകൾക്ക് വേണ്ടി മികച്ച പ്രകടനങ്ങൾ നടത്തിയ ശേഷം 2018 ലാണ് നോർത്ത് ഈസ്റ്റ് യുണൈറ്റഡിന് വേണ്ടി ഐ എസ് എൽ ടൂർണമെന്റിൽ ബൂട്ടണിയുന്നത്. 2002 മുതൽ 2005 വരെ നൈജീരിയൻ ദേശീയ ടീമിൽ അംഗമായിരുന്നു. 2002 സൗത്ത് കൊറിയൻ ലോകകപ്പിൽ നൈജീരിയക്കു വേണ്ടിയും ഒഗ്ബേചെ കളിച്ചു.
ടീമിന് വേണ്ടി ഗോളടിക്കാൻ കഴിയുന്ന താരമാണ് ഓഗ്ബചെയെന്ന് അദ്ദേഹത്തെ ടീമിലേക്ക് സ്വാഗതം പറഞ്ഞു കൊണ്ടു ബ്ലാസ്റ്റേഴ്സ് ഹെഡ് കോച്ച് എൽക്കോ ഷറ്റോറി പറഞ്ഞു. യുവകളിക്കാർക്കd അദ്ദേഹത്തിന്റെ പരിചയ സമ്പന്നതയും, നേതൃപാടവവും മുതൽ കൂട്ടാകുമെന്നും ഷറ്റോറി പറഞ്ഞു.
