റഷ്യ: ലോകകപ്പ് ആവേശം കെട്ടഴിയുന്നതിനു മുന്‍പെ ആരാധകരെ അമ്പരപ്പിച്ചു കൊണ്ട് റഷ്യന്‍ സര്‍ക്കാര്‍. രാജ്യത്ത് ക്രിക്കറ്റിനെ ഒരു കായികയിനമായി അംഗീകരിക്കാന്‍ സാധ്യമല്ലെന്നും കായികയിനമായി പരിഗണിക്കാന്‍ വേണ്ട ഗുണങ്ങളൊന്നും ക്രിക്കറ്റിനില്ലെന്നുമാണ് റഷ്യന്‍ സര്‍ക്കാര്‍ പ്രഖ്യാപിച്ചിരിക്കുന്നത്.
ന്യൂസിലന്‍ഡിനെ കീഴടക്കി ആതിഥേയരായ ഇംഗ്ലണ്ട് ലോകകപ്പിന്റെ വിജയ കിരീടം ചൂടിയിട്ട് ആഴ്ചകള്‍ പിന്നിട്ടിട്ടും ക്രിക്കറ്റ് ചര്‍ച്ചകള്‍ ഇപ്പോഴും സജീവമാണ്. ഈ സാഹചര്യത്തിലാണ് കൂടുതല്‍ ചര്‍ച്ചകള്‍ക്ക് വഴിയൊരുക്കി റഷ്യയുടെ പുതിയ പ്രഖ്യാപനം.
ക്രിക്കറ്റിനു പുറമെ മുവായ് തായ് എന്ന ബോക്‌സിംഗ് മല്‍സരത്തെയും കായികയിനമായി അംഗീകരിക്കാന്‍ കഴിയില്ലെന്ന് റഷ്യ വ്യക്തമാക്കിയിട്ടുണ്ട്. ലോകത്ത് ഫുട്‌ബോള്‍ കഴിഞ്ഞാല്‍ ഏറ്റവും പ്രചാരത്തിലുള്ള കായികയിനമാണ് ക്രിക്കറ്റ്. അതുകൊണ്ടു തന്നെ കായിക മന്ത്രാലയത്തിന്റെ ഈ പ്രഖ്യാപനം ഏറെ നിരാശയുണ്ടാക്കുന്നുവെന്ന് ക്രിക്കറ്റ് ആരാധകര്‍ പറയുന്നു.
ക്രിക്കറ്റിനെ ഒരു കായികയിനമായി പ്രഖ്യാപിക്കാത്തതിനാല്‍ റഷ്യയില്‍, ക്രിക്കറ്റിനെ പിന്തുണയ്‌ക്കുന്ന വിധം സര്‍ക്കാരില്‍ നിന്നും സഹായങ്ങളൊന്നും ലഭിച്ചേക്കില്ല എന്ന ആശങ്കയും നിലനില്‍ക്കുന്നുണ്ട്.
