കാലിഫോര്ണിയ : വ്യാജ ചിത്രങ്ങളും വീഡിയോകളും തലവേദന സൃഷ്ടിക്കുന്ന ഇന്നത്തെ കാലത്ത് വ്യാജന്മാരെ തടയിടാന് പുത്തന് സാങ്കേതിക വിദ്യ വരുന്നു. കാലിഫോര്ണിയ സര്വ്വകലാശാലയില് ഇന്ത്യന് വംശജന്റെ നേതൃത്വത്തിലാണ് പുതിയ സംവിധാനം ഒരുങ്ങുന്നത്.
ഇലക്ട്രിക്കല് ആന്ഡ് കമ്പ്യൂട്ടര് എഞ്ചിനീയറിംഗ് വിഭാഗത്തിലെ പ്രൊഫസര് അമിത് റോയ് ചൗധരിയുടെ നേതൃത്വത്തിലുള്ള സംഘമാണ് വ്യാജ ചിത്രങ്ങളെയും വീഡിയോകളെയും തിരിച്ചറിയാന് സാധിക്കുന്ന സജ്ജീകരണം ഒരുക്കുന്നത്.
ഒറ്റ നോട്ടത്തില് വിദഗ്ധരെപ്പോലും കബളിപ്പിക്കുംവിധം എഡിറ്റു ചെയ്ത ഇത്തരം ചിത്രങ്ങളെ വേഗത്തില് കണ്ടുപിടിക്കാം എന്നു മാത്രമല്ല, എവിടെവെച്ച് നിര്മ്മിച്ചുവെന്നു അന്വേഷിച്ച് കണ്ടെത്താനും ഇതിലൂടെ സാധിക്കുമെന്നു ചൗധരി പറയുന്നു. ഇതിനായി ഉണ്ടാക്കിയ നിര്മിത ബുദ്ധിയെ കാര്യങ്ങള് പഠിപ്പിച്ചുക്കൊണ്ടിരിക്കുകയാണ് ചൗധരിയുടെ നേതൃത്വത്തിലുള്ള ഗവേഷണ സംഘം.
മനുഷ്യനു സാധ്യമാവാത്ത തരത്തില് ചിത്രത്തിന്റെയോ വീഡിയോുടെയോ ഓരോ സൂഷ്മ ഭാഗങ്ങളും ഇവര് നിര്മ്മിച്ചെടുത്ത സംവിധാനത്തിനു പരിശോധിക്കാന് സാധിക്കും. ഈ സംവിധാനത്തിന്റെ കടന്നുവരവ് സൈബര് സുരക്ഷാ സംവിധാനങ്ങള്ക്ക് കൂടുതല് സഹായകരമാകുമെന്നും വിദഗ്ധര് ചൂണ്ടുക്കാട്ടുന്നു.
