Special

ഒരു പേരിലൊക്കെ എന്തിരിക്കുന്നു; പറയാന്‍ വരട്ടെ; ഒരു പേരില്‍ ജീവിതം പടുത്തുയര്‍ത്തിയ പെണ്‍കുട്ടിയുടെ കഥ കേള്‍ക്കാം

സ്വന്തം പേര് മൂലം കണ്ണീര്‍ നിറഞ്ഞിരുന്ന ബാല്യത്തില്‍ നിന്നും വിജയത്തിന്റെ പുഞ്ചിരി പടര്‍ത്തിയ പെണ്‍കുട്ടിയുടെ കഥ. ‘വേണ്ടാം’- തിരുവള്ളൂര്‍ നാരായണപുരം ഗ്രാമത്തിലെ കര്‍ഷകത്തൊഴിലാളികളായ അശോകന്‍-ഗൗരി ദമ്പതികളുടെ നാലാമത്തെ മകളുടെ പേരാണിത്. മൂന്ന് പെണ്‍കുട്ടികള്‍ക്കു ശേഷം ആണ്‍കുട്ടിക്കു കാത്തിരുന്ന ദമ്പതികള്‍ക്ക് പിറന്ന നാലാമത്തെ പെണ്‍കുട്ടി. തങ്ങളുടെ ആഗ്രഹം നടക്കാതെ വന്നപ്പോള്‍ പിറന്നുവീണ പെണ്‍കുട്ടിയോടുള്ള അനിഷ്ടം പേരിലും നിറഞ്ഞു. ഞങ്ങള്‍ക്ക് വേണ്ട എന്ന അര്‍ത്ഥത്തോടെ അവര്‍ അവളെ വേണ്ടാം എന്നു വിളിച്ചു. അതെ വേണ്ടാം എന്നാല്‍ വേണ്ട എന്നര്‍ത്ഥം.

സ്വന്തം പേര് മൂലം കണ്ണീര്‍ നിറഞ്ഞതായിരുന്നു അവളുടെ ബാല്യം. സുഹൃത്തുകളുടെയും നാട്ടുക്കാരുടെയും മുന്നില്‍ കളിയാക്കല്‍ ഏല്‍ക്കേണ്ടി വന്നു.

എന്നാല്‍ ഇതു പഴയകഥ… അന്നു വേണ്ടാതിരുന്ന വേണ്ടാം ഇന്നു കുടുംബത്തിനു മാത്രമല്ല ഗ്രാമത്തിനു മുഴുവന്‍ അഭിമാനമാണ്. ബിടെക് പൂര്‍ത്തിയാക്കിയ വേണ്ടാമിനെ തേടി വന്നത് ജപ്പാനിലെ 22 ലക്ഷം രൂപ വാര്‍ഷിക ശമ്പളമുളള സ്വകാര്യകമ്പനിയുടെ ജോലിയാണ്. ഇന്നവള്‍ തിരുവള്ളൂര്‍ ജില്ലയിലെ പെണ്‍കുട്ടികളുടെ ക്ഷേമത്തിനായുളള ബ്രാന്‍ഡ് അംബാസഡറാണ്. ഞങ്ങള്‍ക്ക് വേണ്ട എന്നുള്ള വിളി കേട്ടു കരഞ്ഞു കലങ്ങിയ കണ്ണുകളില്‍ ഇന്നു വിജയത്തിന്റെ തിളക്കമാണ്.

പേരിലെ അതൃപ്തി മകളോട് കാണിച്ചിട്ടില്ലെന്നു കുടുംബം പറയുന്നു. മകളുടെ ആഗ്രഹപ്രകാരമാണ് ബിടെകിന് ചേര്‍ത്തതെന്നും ജാപ്പനീസ് ഭാഷ പഠിപ്പിച്ചതെന്നും അച്ഛന്‍ പറഞ്ഞു. എന്നാല്‍ ഞങ്ങള്‍ കാരണം അവള്‍ക്ക് അപമാനം ഏല്‍ക്കേണ്ടി വന്നിട്ടുണ്ട്. മാതാപിതാക്കളോട് പരിഭവം ഇല്ലെന്നും അന്നും അവര്‍ക്ക് എന്നോട് സ്‌നേഹം മാത്രമാണെന്നും വേണ്ടാം പറയുന്നു.

ഒരിക്കല്‍ ഞങ്ങള്‍ക്ക് വേണ്ട എന്നു വിളിച്ച അച്ഛന്‍ സന്തോഷക്കണ്ണീര്‍ തുടച്ചു കൊണ്ടു പറഞ്ഞു. എന്റെ പൊന്നു മകളെ ‘ഞങ്ങള്‍ക്കു വേണം’. പെണ്‍കുട്ടികള്‍ ബാധ്യതയല്ല. അനുഗ്രഹമാണ്.

അതെ ഞങ്ങള്‍ക്ക് വേണ്ട എന്ന വേണ്ടാം ഇന്നു ഞങ്ങള്‍ക്ക് വേണം. പേരിലെ അര്‍ത്ഥം വിജയം കൊണ്ട് കഴുകികളഞ്ഞവള്‍. തളരാതെ നേടിയ വിജയത്തിന്റെ പ്രതീകമായി വേണ്ടാം മാറി.

178 Shares

Scroll down for comments

Post Your Comments

വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, ജനംടിവിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക.

Back to top button
Close