ലണ്ടന്‍: ആന്താരാഷ്‌ട്ര ട്വന്റി20 ക്രിക്കറ്റില്‍ 1000 റണ്‍സും 100 വിക്കറ്റും നേടുന്ന ആദ്യ താരമെന്ന റെക്കോര്‍ഡ് ഓസ്‌ട്രേലിയന്‍ വനിത ക്രിക്കറ്റ് താരം എലീസ പെറി സ്വന്തമാക്കി. ഇംഗ്ലണ്ടിനെതിരായ പരമ്പരയിലെ രണ്ടാം മത്സരത്തിലാണ് 28കാരിയായ പെറി ചരിത്ര നേട്ടം സ്വന്തമാക്കിയത്.
കഴിഞ്ഞ വര്‍ഷം നടന്ന ടി20 വനിതാ ലോകകപ്പ് ഫൈനലില്‍ ഇംഗ്ലണ്ടിന്റെ നതാലി ഷിവറെ പുറത്താക്കിയാണ് പെറി 100 വിക്കറ്റ് നേട്ടം സ്വന്തമാക്കിയത്. ഇത്തവണ ഇംഗ്ലണ്ടിനെതിരായ മത്സരത്തില്‍ തന്നെ 1000 റണ്‍സ് എന്ന നേട്ടവും പെറിയെ തേടിയെത്തി. പുരുഷ ക്രിക്കറ്റില്‍ ഇതുവരെ ആര്‍ക്കും എത്തിപ്പിടിക്കാന്‍ കഴിയാത്ത റെക്കോര്‍ഡാണ് എലീസ പെറി സ്വന്തമാക്കിയിരിക്കുന്നത്.
ഷഹീദ് അഫ്രീദിയാണ് പെറിക്കു പിന്നില്‍ രണ്ടാം സ്ഥാനത്ത്. അഫ്രീദി 1416 റണ്‍സും 98 വിക്കറ്റുകളും സ്വന്തമാക്കിയപ്പോള്‍ ബംഗ്ലാദേശിന്റെ ഓള്‍ റൗണ്ടര്‍ ഷക്കിബ് അല്‍ ഹസന്‍ 1471 റണ്‍സും 88 വിക്കറ്റും സ്വന്തമാക്കി മൂന്നാം സ്ഥാനത്താണ്.
ക്രിക്കറ്റിനു പുറമേ ഓസ്‌ട്രേലിയന്‍ ഫുട്‌ബോള്‍ ടീമിലെയും അംഗമാണ് എലീസ പെറി. ക്രിക്കറ്റില്‍ മീഡിയം പേസ് ബോളിംഗും വലം കൈ ബാറ്റിംഗുമാണെങ്കില്‍ ഫുട്‌ബോളില്‍ പെറി പ്രതിരോധ നിരയിലെ വിശ്വസ്തയായിരുന്നു. എന്നാല്‍ ക്രിക്കറ്റില്‍ കൂടുതല്‍ ശ്രദ്ധ കേന്ദ്രീകരിക്കുന്നതിന്റെ ഭാഗമായി അടുത്തിടെ താരം ഫുട്‌ബോള്‍ കളി മതിയാക്കിയിരുന്നു. പതിനാറാം വയസില്‍ രാജ്യാന്തര മത്സരത്തില്‍ അരങ്ങേറ്റം കുറിച്ച പെറി, ഓസ്‌ട്രേലിയന്‍ ക്രിക്കറ്റ് ടീമിലെത്തുന്ന പ്രായം കുറഞ്ഞ താരമെന്ന ബഹുമതിക്കും അര്‍ഹയായിരുന്നു.
