ന്യൂഡല്ഹി: ഇന്ത്യന് ക്രിക്കറ്റ് ടീമിന്റെ പുതിയ പരിശീലകസ്ഥാനത്തേക്ക് രണ്ടായിരത്തോളം അപേക്ഷകള്. ഇന്നലെയായിരുന്നു പുതിയ സ്ഥാനത്തേക്ക് അപേക്ഷ നല്കാനുള്ള അവസാനതീയതി. കപില്ദേവ് അധ്യക്ഷനായ മൂന്നാംഗ ക്രിക്കറ്റ് ഉപദേശകസമിതിയാണ് (സിഎസി) പരിശീലകനെ തിരഞ്ഞെടുക്കുന്നത്. അന്ഷുമാന് ഗെയ്ക്വാദ്, ശാന്ത രംഗസ്വാമി എന്നിവരാണ് സമിതിയിലുള്ള മറ്റംഗങ്ങള്. വനിതാ ടീം കോച്ചിനെ തിരഞ്ഞെടുക്കേണ്ട ചുമതലയും കപില്ദേവ് അധ്യക്ഷനായ മൂന്നാംഗ ക്രിക്കറ്റ് ഉപദേശകസമിതിയ്ക്കാണ്.
രവി ശാസ്ത്രിയുടെ നേതൃത്വത്തിലുള്ള പരിശീലക സംഘത്തിന്റെ കാലാവധി ലോകകപ്പോടെ അവസാനിച്ചിരുന്നു. പിന്നീട് വെസ്റ്റിന്ഡീസ് പര്യടനം വരെ നീട്ടുകയായിരുന്നു. നിലവിലെ പരിശീലകന് രവി ശാസ്ത്രിയ്ക്ക് പുറമെ ഓസ്ട്രേലിയക്കാരന് ടോം മൂഡി, മുന് ഇന്ത്യന് താരങ്ങളായ ലാല്ചന്ദ് രജ്പുത്, റോബിന് സിങ് തുടങ്ങിയവരാണ് സാധ്യതാ പട്ടികയിലുളള പ്രമുഖര്. പരിശീലകനാകാന് അപേക്ഷിച്ചവരില് ചിലര് ഏജന്റുമാരെ നിയോഗിച്ചിരിക്കുന്നതിനാല് അവരുടെ പേരുകള് ലഭ്യമല്ല.
ജൂലൈ 16നാണ് പുതിയ പരിശീലക സംഘത്തെ ക്ഷണിച്ച് ബിസിസിഐ പരസ്യം നല്കിയത്. മുഖ്യ പരിശീലകനു പുറമെ ബാറ്റിങ്, ബോളിങ്, ഫീല്ഡിങ് പരിശീലകര്ക്കായും അപേക്ഷ ക്ഷണിച്ചിരുന്നു. ഇന്ത്യയുടെ ടെസ്റ്റ് താരങ്ങളായിരുന്ന പ്രവീണ് ആംറെ, വെങ്കടേഷ് പ്രസാദ് എന്നിവര് ബാറ്റിങ്, ബോളിങ് പരിശീലകരുടെ റോളുകളിലേക്ക് അപേക്ഷിച്ചിട്ടുണ്ട്. പുരുഷ ടീം പരിശീലകനായുള്ള മുഖാമുഖം ഓഗസ്റ്റ് പകുതിയോടെ നടക്കുമെന്നാണു സൂചന. അടുത്ത വര്ഷത്തെ ട്വന്റി20 ലോകകപ്പ് വരെയാണു പുതിയ പരിശീലകന്റെ കാലാവധി.
വെസ്റ്റിന്ഡീസ് പര്യടനത്തിനു പുറപ്പെടും മുന്പുള്ള മാധ്യമസമ്മേളനത്തില് ഇന്ത്യന് ക്യാപ്റ്റന് വിരാട് കോലി ശാസ്ത്രി പരിശീലക സ്ഥാനത്തു തുടരുന്നതിനെ അനുകൂലിച്ചിരുന്നു.
