ബംഗളൂരു: വെന്ഗലംപ്പള്ളി പ്രൈമറി ഗവണ്മെന്റ് സ്കൂളില് 12 ദിവസങ്ങള്ക്ക് മുന്പാണ് ലക്ഷ്മി അഡ്മിഷന് എടുത്തത്. ചുരുങ്ങിയ ദിവസങ്ങള് കൊണ്ടു തന്നെ ലക്ഷ്മി എല്ലാവരുടെയും പ്രിയങ്കരിയായി.
ലക്ഷ്മിയെ കുറിച്ചു ആര്ക്കും മോശം അഭിപ്രായമില്ല. അവളെ പറ്റി പറയാന് ഹെഡ്മാസ്റ്റര് അബ്ദുള് ലത്തിഫിന് നൂറുനാവാണ്. അച്ചടക്കവും അനുസരണശീലവുമുളള വിദ്യാര്ഥിനിയാണ് ലക്ഷ്മി. സ്കൂളിന്റെ എല്ലാ നിയമങ്ങളും അനുസരിക്കും. സ്കൂള് അസംബ്ലിക്കു കൃത്യസമയത്ത് എത്തും. എല്ലാ ക്ലാസുകളും മുടങ്ങാതെ പങ്കെടുക്കും. ക്ലാസുകള് കഴിഞ്ഞു കൂട്ടുകാരുമായി കളിക്കും.
എല്ലാ സ്കൂളിലും ഇങ്ങനെയൊരു വിദ്യാര്ഥി കാണുമല്ലോ? ലക്ഷ്മിക്കു മാത്രം എന്താണ് ഇത്ര പ്രത്യേകത എന്നു ഇതു വായിക്കുന്നവരില് ഭൂരിഭാഗംപേര്ക്കും തോന്നിയിരിക്കാം. തികച്ചും സ്വഭാവികമായി വരുന്ന ചോദ്യമാണിത്.
12ദിവസങ്ങള്ക്ക് മുന്പ് സ്കൂളില് എത്തിയ ചാരനിറത്തിലുള്ള കുരങ്ങാണ് ലക്ഷമി. സാധാരണ കുരങ്ങുകള് കാണിക്കുന്ന സ്വഭാവമൊന്നും ലക്ഷ്മിക്ക് ഇല്ല. എല്ലാ ദിവസവും കൃത്യമായി ലക്ഷ്മി സ്കൂളില് വരാന് തുടങ്ങി. ഇത് വിദ്യാര്ഥികളുടെ ശ്രദ്ധ മാറുന്നതിന് കാരണമായതിനാല് വാതില് അടച്ചുപഠിപ്പിക്കാന് തുടങ്ങി. എന്നാല് ജനല്പടിയിലിരുന്നു ശ്രദ്ധയോടെ പഠിക്കുന്ന ലക്ഷ്മിയെ പിന്നീട് അധ്യാപകര് സ്ഥിരപ്രവേശനം നല്കുകയായിരുന്നു.
കുരങ്ങിന്റെ സാനിധ്യം ആദ്യം അധ്യാപകരെയും വിദ്യാര്ഥികളെയും ഭയപ്പെടുത്തിയെങ്കിലും പിന്നീട് കുരങ്ങ് സ്കൂളിന്റെ അവിഭാജ്യഘടകമായി മാറി. വിദ്യാര്ഥികള് അവളെ സ്നേഹത്തോടെ ലക്ഷ്മിയെന്ന് വിളിച്ചു. ലക്ഷ്മിയുടെ വരവിനു ശേഷം എല്ലാദിവസവും 100 ശതമാനമാണ് വിദ്യാര്ഥികളുടെ ഹാജരെന്ന് പ്രഥമഅധ്യാപകന് പറഞ്ഞു.
രണ്ടു ദിവസമായി ലക്ഷ്മിയ്ക്കു വയറിന് ആരോഗ്യപ്രശ്നമുണ്ട്. ഡോക്ടര് വന്നു പരിശോധിച്ച ശേഷം കക്ഷിക്ക് ഡയറ്റ് പറഞ്ഞിരിക്കുകയാണ്. ജങ്ക് ഫുഡ് ഇനി കഴിക്കാന് പറ്റില്ല. ദിവസവും ഇനി പഴങ്ങള് മാത്രം കഴിച്ചാല് മതിയെന്നാണ് പ്രധമഅധ്യാപകന്റെ അറിയിപ്പ്.
