കൊച്ചി : ഇന്ത്യയില് ഏറ്റവുമധികം ആരാധകരുള്ള ഫുട്ബോള് ക്ലബ് എന്ന നേട്ടം ഇനി കേരള ബ്ലാസ്റ്റേഴ്സിന് സ്വന്തം. ബ്ലാസ്റ്റേഴ്സിന്റെ ഔദ്യോഗിക ഇന്സ്റ്റാഗ്രാം പേജിലെ ഫോളോവേഴ്സിന്റെ എണ്ണം 10 ലക്ഷം കടന്നു.
2014 മെയ് 14ന് രൂപം കൊണ്ട കേരള ബ്ലാസ്റ്റേഴ്സിനെ ഫെയ്സ്ബുക്ക്, ട്വിറ്റര്, ഇന്സ്റ്റഗ്രാം തുടങ്ങിയ സാമൂഹിക മാധ്യമങ്ങളില് 3.9 ദശലക്ഷം ആളുകളാണ് പിന്തുടരുന്നത്. മാത്രമല്ല, ഏഷ്യയില് ഏറ്റവും കൂടുതല് ആരാധകരുള്ള അഞ്ചാമത്തെ ഫുട്ബോള് ക്ലബാണ് കേരള ബ്ലാസ്റ്റേഴ്സ്.
ആദ്യമായാണ് ഇന്ത്യന് സൂപ്പര് ലീഗിലെ ഒരു ടീമിന്റെ ഇന്സ്റ്റഗ്രാം ഫോളോവേഴ്സ് 10 ലക്ഷം കടക്കുന്നത്.ഐ.എസ്.എല്ലിലെ മൊത്തം കാഴ്ചക്കാരില് 45 ശതമാനവും ബ്ലാസ്റ്റേഴ്സിന്റെ കളികള്ക്കാണുള്ളത്. കേരളത്തില് ഏറ്റവും അധികം ആളുകള് കണ്ടതായ ആദ്യ പത്തു പരിപാടികളില് സ്ഥിരമായി കേരള ബ്ലാസ്റ്റേഴ്സിന്റെ കളികളും ഉള്പ്പെടുന്നു.
സ്റ്റേഡിയത്തില് ഏറ്റവും അധികം ആരാധകര് തിങ്ങികൂടുന്ന 10 യൂറോപ് ഇതര ടീമുകളില് ഒന്നായ ബ്ലാസ്റ്റേഴ്സിന് ചില ഐപിഎല് ടീമുകളേക്കാള് ആരാധകരുണ്ടെന്നാണ് കണ്ടെത്തല്. ഇത് ക്ലബിനുള്ള മികച്ച പിന്തുണ വ്യക്തമാക്കുന്നു.
കഴിഞ്ഞ അഞ്ചു വര്ഷകാലമായി ശരാശരി 40000 ആരാധകരാണ് ബ്ലാസ്റ്റേഴ്സിന്റെ കളി കാണാനെത്തുന്നത്. 2018-ലെ ‘ഐഎസ്എല് ബെസ്റ്റ് പിച്ച് ഓഫ് ദി ഇയര്’പുരസ്കാരവും കേരള ബ്ലാസ്റ്റേഴ്സിനായിരുന്നു.
