വെസ്റ്റ് ഇന്‍ഡീസിനെതിരായ ഏകദിന പരമ്പരയില്‍ കോഹ്‌ലിയെ കാത്തിരിക്കുന്നത് റെക്കോര്‍ഡുകളുടെ ‘പെരുമഴ’

ഗയാന: വാര്‍ത്തകളില്‍ നിന്ന് ചുരുക്കം സമയങ്ങളില്‍ മാത്രം മാറി നില്‍ക്കുന്ന ശീലമേ ഇന്ത്യന്‍ നായകന്‍ വിരാട് കോഹ്‌ലിക്കുള്ളൂ. അടുത്തിടെ വെസ്റ്റ് ഇന്‍ഡീസിനെതിരായ ട്വന്റി20 പരമ്പര ഇന്ത്യ തൂത്തുവാരിയിരുന്നെങ്കിലും വിരാട് കോഹ്‌ലിയുടെ ബാറ്റിന് അധികം പണിപ്പെടേണ്ടി വന്നിരുന്നില്ല. എന്നാല്‍ ഏകദിന പരമ്പരയോടെ കോഹ്‌ലി വീണ്ടും വാര്‍ത്തകളില്‍ സജീവമാകാനൊരുങ്ങുകയാണ്. നിരവധി റെക്കോര്‍ഡുകളാണ് പരമ്പരയില്‍ കോഹ്‌ലിയെ കാത്തിരിക്കുന്നത്.

ഏകദിനത്തില്‍ വെസ്റ്റ് ഇന്‍ഡീസിനെതിരെ ഏറ്റവും കൂടുതല്‍ റണ്‍സ് നേടുന്ന ബാറ്റ്‌സ്മാന്‍ എന്ന റെക്കോര്‍ഡാണ് കോഹ്‌ലിയുടെ കൈയ്യെത്തും ദൂരത്തുള്ളത്. 1930 റണ്‍സ് നേടിയ മുന്‍ പാകിസ്ഥാന്‍ താരം ജാവേദ് മിയാന്‍ദാദാണ് നിലവില്‍ വെസ്റ്റ് ഇന്‍ഡീസിനെതിരെ കൂടുതല്‍ റണ്‍സ് നേടിയ താരം. 1912 റണ്‍സുമായി കോഹ്‌ലിയാണ് രണ്ടാം സ്ഥാനത്ത്. 19 റണ്‍സ് കൂടി നേടിയാല്‍ കോഹ്‌ലിക്ക് മിയാന്‍ദാദിനെ മറികടക്കാം.

വെസ്റ്റ് ഇന്‍ഡ്യന്‍ മണ്ണില്‍ ഇന്ത്യ-വെസ്റ്റ് ഇന്‍ഡീസ് മത്സരങ്ങളില്‍ ഏറ്റവും കൂടുതല്‍ റണ്‍സ് നേടിയ താരമെന്ന റെക്കോര്‍ഡ് വെസ്റ്റ് ഇന്‍ഡീസ് താരം രാംനരേഷ് സര്‍വന്റെ പേരിലാണ്. 17 മത്സരങ്ങളില്‍ നിന്ന് 700 റണ്‍സാണ് സര്‍വന്‍ ഇന്ത്യക്കെതിരെ നേടിയത്. 12 മത്സരങ്ങളില്‍ നിന്ന് 556 റണ്‍സുമായി കോഹ്‌ലിയാണ് രണ്ടാം സ്ഥാനത്ത്. പരമ്പരയില്‍ ഈ നേട്ടം മറി കടക്കാന്‍ കോഹ്‌ലിക്ക് ഇനി വേണ്ടത് 145 റണ്‍സാണ്.

ഇന്ത്യ-വെസ്റ്റ് ഇന്‍ഡീസ് മത്സരങ്ങളില്‍ ഏറ്റവും കൂടുതല്‍ സെഞ്ച്വറികള്‍ നേടിയ താരമെന്ന റെക്കോര്‍ഡിന് കോഹ്‌ലിക്ക് ഇനി വേണ്ടത് ഒരു സെഞ്ച്വറി മാത്രം. നിലവില്‍ രണ്ട് വീതം സെഞ്ച്വറികളുമായി വിരാട് കോഹ്‌ലിയും ഡെസ്‌മോണ്ട് ഹൈനെസുമാണ് ഒന്നാം സ്ഥാനം പങ്കിടുന്നത്.

ഈ പരമ്പരയില്‍ 88 റണ്‍സ് നേടാന്‍ കഴിഞ്ഞാല്‍ വെസ്റ്റ് ഇന്‍ഡീസിനെതിരെ 2000 റണ്‍സ് തികക്കുന്ന ആദ്യ ബാറ്റ്‌സ്മാനെന്ന റെക്കോര്‍ഡും വിരാട് കോഹ്‌ലി സ്വന്തമാക്കും. നിലവില്‍ 33 മത്സരങ്ങളില്‍ നിന്ന് 70.81 റണ്‍സ് ശരാശരിയില്‍ 1912 റണ്‍സാണ് കോഹ്‌ലിയുടെ സമ്പാദ്യം.

ഏകദിന ക്രിക്കറ്റില്‍ ഇന്ത്യക്കായി ഏറ്റവും കൂടുതല്‍ റണ്‍സ് നേടുന്ന രണ്ടാമത്തെ താരമെന്ന റെക്കോര്‍ഡ് സ്വന്തമാക്കാന്‍ കോഹ്‌ലിക്ക് ഇനി വേണ്ടത് 78 റണ്‍സ്. 11,363 റണ്‍സുമായി മുന്‍ ഇന്ത്യന്‍ നായകന്‍ സൗരവ് ഗാംഗുലിയാണ് രണ്ടാം സ്ഥാനത്ത്. കോഹ്‌ലിക്ക് 11,286 റണ്‍സുണ്ട്. 18426 റണ്‍സുമായി സച്ചിന്‍ ടെണ്ടുല്‍ക്കറാണ് ഒന്നാമത്.

പരമ്പരയില്‍ 2 അര്‍ദ്ധ സെഞ്ച്വറികള്‍ കൂടി നേടിയാല്‍ വെസ്റ്റ് ഇന്‍ഡീസിനെതിരെ ഏകദിന മത്സരങ്ങളില്‍ ഏറ്റവും കൂടുതല്‍ അര്‍ദ്ധ സെഞ്ച്വറികള്‍ നേടുന്ന താരമെന്ന റെക്കോര്‍ഡും കോഹ്‌ലി സ്വന്തമാക്കും.