പോര്ട്ട് ഓഫ് സ്പെയ്ന്: വെസ്റ്റ് ഇന്ഡീസിനെതിരായ രണ്ടാം ഏകദിനത്തില് ഇന്ത്യക്ക് 59 റണ്സ് വിജയം. 280 റണ്സ് പിന്തുടര്ന്ന വെസ്റ്റ് ഇന്ഡീസിന് മഴയെ തുടര്ന്ന് വിജയലക്ഷ്യം 46 ഓവറില് 270 റണ്സായി പുനര് നിര്ണ്ണയിച്ചിരുന്നു. എന്നാല് 42 ഓവറില് 210 റണ്സ് എടുക്കുന്നതിനിടയില് വെസ്റ്റ് ഇന്ഡീസിന്റെ എല്ലാവരും പുറത്തായി. ഇതോടെ 3 മത്സരങ്ങളുടെ പരമ്പരയില് ഇന്ത്യ 1-0 ന് മുന്നിലെത്തി.
സ്കോര്: ഇന്ത്യ 279/7 (50), വെസ്റ്റ് ഇന്ഡീസ് 210 (42)
നേരത്തെ ടോസ് നേടി ആദ്യം ബാറ്റ് ചെയ്ത ഇന്ത്യക്ക് ഓപ്പണര് ശിഖര് ധവാന്റെ (2) വിക്കറ്റ് തുടക്കത്തിലേ നഷ്ടമായി. നിലയുറപ്പിക്കാനാകാതെ രോഹിത് ശര്മ്മയും (18) മടങ്ങിയതോടെ ഇന്ത്യ പ്രതിരോധത്തിലായിരുന്നു. തുടര്ന്ന് നായകന് വിരാട് കോഹ്ലി സ്കോര് മുന്നോട്ട് കൊണ്ടുപോയി. ഇതിനിടെ റിഷഭ് പന്ത് 20 റണ്സ് നേടി പുറത്തായി. ഇതിനു പിന്നാലെ ക്രീസിലെത്തിയ ശ്രേയസ് അയ്യര് അര്ധ സെഞ്ച്വറിയുമായി (71) കോഹ്ലിക്ക് മികച്ച പിന്തുണ നല്കി. 125 പന്തില് 14 ബൗണ്ടറികളും ഒരു സിക്സറും പറത്തി കരിയറിലെ 42-ാം സെഞ്ച്വറി (120) കുറിച്ച ശേഷമാണ് കോഹ്ലി (120) മടങ്ങിയത്.
വെസ്റ്റ് ഇന്ഡീസിനു വേണ്ടി കാര്ലോസ് ബ്രാത്വെയ്റ്റ് 3 വിക്കറ്റ് വീഴ്ത്തി. ഷെല്ഡന് കോട്രെല്, കെമാര് റോച്ച്, റോസ്റ്റന് ചെയ്സ് എന്നിവര് ഓരോ വിക്കറ്റ് വീതം സ്വന്തമാക്കി.
മറുപടി ബാറ്റിംഗില് വെസ്റ്റ് ഇന്ഡീസ് ഓപ്പണര് എവിന് ലൂയിസ് ഫോമിലായിരുന്നു. എന്നാല് തന്റെ കരിയറിലെ 300-ാം ഏകദിനം കളിച്ച ക്രിസ് ഗെയ്ല് 11 റണ്സ് നേടി തുടക്കത്തിലേ പുറത്തായി. മൂന്നാമനായെത്തിയ ഷായ് ഹോപ്പും(5) ഹെറ്റ്മെയറും(18) പുറത്തായതോടെ വെസ്റ്റ് ഇന്ഡീസിന്റെ തകര്ച്ച തുടങ്ങിയിരുന്നു. 80 പന്തില് 65 റണ്സ് നേടിയ എവിന് ലൂയിസാണ് വിന്ഡീസ് നിരയിലെ ടോപ് സ്കോറര്.
8 ഓവറില് 31 റണ്സ് വഴങ്ങി 4 വിക്കറ്റ് വീഴ്ത്തിയ ഭുവനേശ്വര് കുമാറിന്റെ പ്രകടനം മത്സരത്തില് നിര്ണ്ണായകമായി. മുഹമ്മദ് ഷമിയും കുല്ദീപ് യാദവും 2 വിക്കറ്റ് വീഴ്ത്തിയപ്പോള് ഖലീല് അഹമ്മദ്, രവീന്ദ്ര ജഡേജ എന്നിവര് ഓരോ വിക്കറ്റ് സ്വന്തമാക്കി.
