ന്യൂയോര്‍ക്ക്: ഗ്രാന്റ്സ്ലാം കിരീടത്തിലേയ്‌ക്ക് സെറീനക്കിനി ഒരു ചുവടുമാത്രം ബാക്കി.എതിരാളി കാനഡയുടെ ബിയാന്‍കാ ആന്‍ഡ്രേസ്‌ക്യൂവാണ്.കനത്ത പോരാട്ടത്തിനൊടുവില്‍ 7-6(3),7-5നാണ് സ്വിസ് താരം ബെലിന്റാ ബെന്‍സിക്കിനെ ആന്‍ഡ്രേസ്‌ക്യൂ പരാജയപ്പെടുത്തിയത്.
ആദ്യസെമിയില്‍ എലീന വിറ്റോലീനയെ സെറീന തകര്‍ത്തത് 6-3,6-1 എന്ന നേരിട്ടുള്ള സെറ്റുകള്‍ക്ക്. രണ്ടു വര്‍ഷമായി കാണാറുള്ള പോലെ ക്വാര്‍ട്ടര്‍മുതലുള്ള എതിരാളികളില്‍ നിന്ന് യാതൊരുവെല്ലുവിളിയും നേരിടാതെയാണ് സെറീന വിജയം കൈപ്പിടിയിലാക്കിയത്.
1999ലാണ് സെറീന ആദ്യമായി യുഎസ് ഓപ്പണ്‍ നേടുന്നത്. കരിയറിലെ തന്റെ 24-ാംമത്തെ ഗ്രാന്റ്സ്ലാം കിരീടമെന്ന നേട്ടമാണ് സെറീനയെ കാത്തിരിക്കുന്നത്.മറ്റൊരു പ്രത്യേകത 2017ന് ശേഷം ഒരു ഗ്രാന്റ് സ്ലാം കിരീടവും സെറീന നേടിയിട്ടില്ല എന്നതാണ്.മുന്‍പ് 6 തവണ കിരീടം ചൂടിയ സെറീനയാണ് ഫ്‌ളഷിംഗ് മെഡോയിലെ പ്രീയതാരം. സ്വന്തം നാട്ടിലെ കിരീടമാണ് സെറീനയ്‌ക്കിത് എന്നതു തന്നെയാണ് പ്രത്യേകതയും.
കഴിഞ്ഞ വര്‍ഷമാണ് ആന്‍ഡ്രേസ്‌ക്യൂ ആദ്യമായി യുഎസ് ഓപ്പണില്‍ യോഗ്യത നേടിയത്.നിലവില്‍ 15-ാം റാങ്കിങ്ങിലുള്ള ആന്‍ഡ്രേസ്‌ക്യൂ ഗ്രാന്‍ഡ്സ്ലാം ഫൈനലില്‍ കയറുന്ന രണ്ടാമത്തെ കാനഡ വനിതാ താരമാണ് .
