ന്യൂഡൽഹി : ലോക ഗുസ്‌തി ചാമ്പ്യന്‍ഷിപ്പിലും ബോക്സിങ് ചാമ്പ്യന്‍ഷിപ്പിലും മികച്ച പ്രകടനം കാഴ്ചവച്ച താരങ്ങൾക്കു ഭാരത സർക്കാരിന്റെ ആദരം .ഇന്ത്യയുടെ അഭിമാനമുയര്‍ത്തിയ താരങ്ങളായ ദീപക് പൂനിയ,വിനേഷ് ഫോഗട്ട്, രവി കുമാര്‍, ബജ്‌റംഗ് പൂനിയ, രാഹുല്‍ അവാരെ എന്നിവരെയാണ് ആദരിക്കുന്നത് .കേന്ദ്ര കായികമന്ത്രാലയത്തിന്‍റെ പാരിതോഷികം കായികമന്ത്രി കിരണ്‍ റിജി‌ജുവാണ് പ്രഖ്യാപിച്ചത്.
ചാമ്പ്യന്‍ഷിപ്പില്‍ വെള്ളി മെഡല്‍ നേടിയ ദീപക് പൂനിയക്ക് ഏഴ് ലക്ഷവും വെങ്കല മെഡല്‍ നേടിയ വിനേഷ് ഫോഗട്ട്, രവി കുമാര്‍, ബജ്‌റംഗ് പൂനിയ, രാഹുല്‍ അവാരെ എന്നിവര്‍ക്ക് നാല് ലക്ഷവുമാണ് കായികമന്ത്രാലയം പ്രഖ്യാപിച്ചത്.ദീപക് പൂനിയ 86 കിലോ ഫ്രീസ്റ്റൈല്‍ വിഭാഗം ഫൈനലില്‍ പരിക്കുമൂലം പിന്‍മാറിയതോടെയാണ് മെഡല്‍ വെള്ളിയായി മാറിയത് . സുശീല്‍ കുമാറാണ് ആദ്യമായി ലോക ചാമ്പ്യനായ ആദ്യ ഇന്ത്യന്‍ ഗുസ്‌തി താരം. ആ ഭാഗ്യം ദീപകിന് നഷ്ടമായി. ലോക ചാമ്പ്യന്‍ ഹസന്‍ യസ്ദാനിയായിരുന്നു ഫൈനലില്‍ ദീപക്കിന്‍റെ എതിരാളി.
ഇതിനിടെ മറ്റൊരു കായിക ഇനമായ ലോക ബോക്‌സിംഗ് ചാമ്പ്യന്‍ഷിപ്പിലെ താരങ്ങളെയും കേന്ദ്ര കായിക മന്താലയം ആദരിക്കുന്നുണ്ട് .അതിന്റെ ഭാഗമായി വെള്ളി മെഡല്‍ നേടിയ അമിത് പാംഗലിന് 14 ലക്ഷം രൂപ പാരിതോഷികം കിരണ്‍ റിജിജു നേരത്തെ പ്രഖ്യാപിച്ചിരുന്നു.ആദ്യമായാണ് ഒരു ഇന്ത്യൻ താരം ഈ നേട്ടം കൊയ്യുന്നത് .അതെ ചാമ്പ്യൻഷിപ്പിൽ വെങ്കല മെലഡല്‍ നേടിയ മനീഷ് കൗശിക്കിന് എട്ട് ലക്ഷവും മന്ത്രി സമ്മാനിക്കും .
