ബംഗളൂരു: വിജയ് ഹസാരെ ക്രിക്കറ്റ് ടൂര്‍ണമെന്റില്‍ കേരള താരം സഞ്ജു വി സാംസണിന് ഇരട്ട സെഞ്ച്വറി. ഗോവയ്‌ക്കെതിരായ ഏകദിന മത്സരത്തിലാണ് സഞ്ജു വേഗത്തില്‍ ഇരട്ട സെഞ്ച്വറി പൂര്‍ത്തിയാക്കിയത്. വെറും 125 പന്തുകളില്‍ നിന്നാണ് സഞ്ജു ഇരട്ട സെഞ്ച്വറി കുറിച്ചത്.
ഇരട്ട സെഞ്ച്വറി പ്രകടനത്തോടെ നിരവധി റെക്കോര്‍ഡുകളാണ് സഞ്ജുവിനെ തേടിയെത്തിയത്. ലിസ്റ്റ് എ ക്രിക്കറ്റില്‍ ആദ്യ സെഞ്ച്വറി തന്നെ സഞ്ജു ഇരട്ട സെഞ്ച്വറിയാക്കി മാറ്റുകയായിരുന്നു. 21 ബൗണ്ടറികളും 10 സിക്‌സറുകളുമടക്കം 212 റണ്‍സാണ് സഞ്ജു സ്വന്തമാക്കിയത്. ഇതിനിടെ പാകിസ്ഥാന്‍ താരം ആബിദ് അലിയുടെ 209* റണ്‍സിന്റെ റെക്കോര്‍ഡും സഞ്ജു തിരുത്തിക്കുറിച്ചു.
നേരത്തെ, മഹേന്ദ്ര സിംഗ് ധോണി നേടിയ 183 റണ്‍സ് മറികടന്ന സഞ്ജു ലിസ്റ്റ് എ ക്രിക്കറ്റില്‍ ഇന്ത്യന്‍ വിക്കറ്റ് കീപ്പര്‍ ബാറ്റ്‌സ്മാന്റെ ഏറ്റവും ഉയര്‍ന്ന സ്‌കോറും സ്വന്തം പേരിലാക്കി. വിജയ് ഹസാരെ ട്രോഫിയില്‍ ഒരു താരത്തിന്റെ ഏറ്റവും ഉയര്‍ന്ന സ്‌കോറും ഇതുതന്നെയാണ്.
മൂന്നാം വിക്കറ്റില്‍ സച്ചിന്‍ ബേബിക്കൊപ്പം 338 റണ്‍സ് കൂട്ടുകെട്ടുണ്ടാക്കിയ സഞ്ജു ലിസ്റ്റ് എ ക്രിക്കറ്റിലെ ഏറ്റവും ഉയര്‍ന്ന മൂന്നാം വിക്കറ്റ് കൂട്ടുകെട്ടെന്ന റെക്കോര്‍ഡും സ്വന്തമാക്കി. സച്ചിന്‍ ബേബി 135 പന്തില്‍ 7 ബൗണ്ടറികളും നാല് സിക്‌സറുകളുമുള്‍പ്പെടെ 127 റണ്‍സെടുത്തു.
സഞ്ജുവിന്റെ വെടിക്കെട്ട് ബാറ്റിംഗ് മികവില്‍ 378 റണ്‍സെന്ന കൂറ്റന്‍ സ്‌കോറാണ് കേരളം ഗോവക്കു മുന്നില്‍ വെച്ചത്. എന്നാല്‍ ഗോവയുടെ ബാറ്റിംഗ് പുരോഗമിക്കവെ മഴയെത്തി. 31 ഓവറില്‍ 3 വിക്കറ്റ് നഷ്ടത്തില്‍ 153 റണ്‍സെടുത്തു നില്‍ക്കവെയാണ് മഴ കാരണം കളി തടസപ്പെട്ടത്. പിന്നീട് മത്സരം പുനരാരംഭിക്കാന്‍ കഴിയാതെ വന്നതോടെ മഴനിയമപ്രകാരം കേരളത്തെ വിജയികളായി പ്രഖ്യാപിക്കുകയായിരുന്നു.
