വിജയങ്ങളില്‍ സെഞ്ച്വറി; അപൂര്‍വ്വ നേട്ടം സ്വന്തമാക്കി മിതാലി രാജ്

മുംബൈ: ഇന്ത്യന്‍ വനിത ക്രിക്കറ്റ് താരം മിതാലി രാജിന് അഭിമാന നേട്ടം. ദക്ഷിണാഫ്രിക്കയ്‌ക്കെതിരായ ഏകദിന പരമ്പരയിലെ അവസാന മത്സരത്തില്‍ വിജയിച്ചതോടെ ക്യാപ്റ്റനെന്ന നിലയില്‍ 100 വിജയങ്ങളെന്ന റെക്കോര്‍ഡാണ് മിതാലി സ്വന്തമാക്കിയിരിക്കുന്നത്. ഈ നേട്ടം സ്വന്തമാക്കുന്ന ഇന്ത്യയുടെ ആദ്യ വനിതാ ക്യാപ്റ്റനും ലോകത്തെ രണ്ടാമത്തെ താരവുമായി മിതാലി.

അടുത്തിടെ അന്താരാഷ്‌ട്ര ക്രിക്കറ്റില്‍ 20 വര്‍ഷം പിന്നിട്ട ആദ്യ വനിതാ താരമായി മിതാലി രാജ് മാറിയിരുന്നു. 1999 ജൂണ്‍ 26ന് അയര്‍ലന്‍ഡിനെതിരെ ഏകദിനത്തില്‍ അരങ്ങേറ്റം കുറിച്ച താരം നിലവില്‍ 50 ഓവര്‍ ഫോര്‍മാറ്റില്‍ 20 വര്‍ഷവും 105 ദിവസവും പൂര്‍ത്തിയാക്കി കഴിഞ്ഞു. വനിത ക്രിക്കറ്റില്‍ ഏറ്റവും കൂടുതല്‍ മത്സരങ്ങള്‍ (204) കളിച്ച താരവും മിതാലിയാണ്. 51.38 ശരാശരിയില്‍ 6731 റണ്‍സാണ് മിതാലിയുടെ സമ്പാദ്യം. ഇംഗ്ലണ്ടിന്റെ ഷാര്‍ലറ്റ് എഡ്വേര്‍ഡ്‌സ് (191), ജുലാന്‍ ഗോസ്വാമി (178), ഓസ്ട്രേലിയയുടെ അലക്‌സ് ബ്ലാക്ക്വെല്‍ (144) എന്നിവരാണ് മിതാലിക്ക് പിന്നിലുള്ളത്. അന്താരാഷ്‌ട്ര ക്രിക്കറ്റില്‍ 20 വര്‍ഷം പൂര്‍ത്തിയാക്കിയ നാലാമത്തെ ക്രിക്കറ്റ് താരവും ആദ്യ വനിതാ ക്രിക്കറ്ററും മിതാലി തന്നെയാണ്. നിലവില്‍ സച്ചിന്‍ ടെണ്ടുല്‍ക്കര്‍, സനത് ജയസൂര്യ, ജാവേദ് മിയാന്‍ദാദ് എന്നിവരാണ് മിതാലി രാജിനു മുന്നിലുള്ളത്.

💯and counting….

The joy of victory is much sweeter today as @M_Raj03 completes 100th win as #TeamIndia captain. She is only the second captain to have 100 wins in women's cricket. 👏🏾👏🏾 pic.twitter.com/H5MXKLvPVv

— BCCI Women (@BCCIWomen) October 14, 2019

2021ല്‍ ന്യൂസിലന്‍ഡില്‍ നടക്കാനിരിക്കുന്ന ഏകദിന ലോകകപ്പില്‍ ശ്രദ്ധ കേന്ദ്രീകരിക്കാനായി മിതാലി ട്വന്റി20 ക്രിക്കറ്റില്‍ നിന്നും വിരമിച്ചിരുന്നു. 2006ലാണ് മിതാലി രാജ് ട്വന്റി20യില്‍ അരങ്ങേറ്റം കുറിക്കുന്നത്. 89 മത്സരങ്ങള്‍ കളിച്ച താരം 37.52 ശരാശരിയില്‍ 2,364 റണ്‍സ് നേടിയിട്ടുണ്ട്. 17 അര്‍ദ്ധ സെഞ്ച്വറികളും താരം നേടിയിട്ടുണ്ട്. കഴിഞ്ഞ വര്‍ഷം മലേഷ്യക്കെതിരെ ഏഷ്യാ കപ്പില്‍ പുറത്താകാതെ നേടിയ 97 റണ്‍സാണ് മിതാലിയുടെ ട്വന്റി20യിലെ ഉയര്‍ന്ന സ്‌കോര്‍.