ബാസല്‍: കരിയറില്‍ 1500 മത്സരങ്ങളെന്ന ചരിത്ര നേട്ടം സ്വന്തമാക്കി ടെന്നീസ് ഇതിഹാസം റോഡര്‍ ഫെഡറര്‍. സ്വിസ് ഇന്‍ഡോറില്‍ പുരുഷ സിംഗിള്‍സിന്റെ ആദ്യ റൗണ്ടില്‍ ജര്‍മ്മന്‍ താരം പീറ്റര്‍ ഗോജോവിസ്‌കിനെ പരാജയപ്പെടുത്തിയാണ് ഫെഡറര്‍ ചരിത്ര നേട്ടം ആഘോഷിച്ചത്. ബാസലിലെ ഫെഡററുടെ തുടര്‍ച്ചയായ 21ാം വിജയമാണിത്.
നേരിട്ടുള്ള സെറ്റുകള്‍ക്കാണ് (6-2, 6-1) ഫെഡറര്‍ ഗോജോവിസ്‌കിനെ പരാജയപ്പെടുത്തിയത്. മത്സരത്തിന്റെ ഒരു ഘട്ടത്തില്‍പ്പോലും ഫെഡറര്‍ക്ക് വെല്ലുവിളി ഉയര്‍ത്താന്‍ ഗോജോവിസ്‌ക്കിനായില്ല. ജര്‍മ്മന്‍ താരത്തിനെതിരായ വിജയത്തോടെ ടൂര്‍ണമെന്റിലെ ജയപരാജയങ്ങളുടെ റെക്കോര്‍ഡും ഫെഡറര്‍ മെച്ചപ്പെടുത്തി. 72 മത്സരങ്ങള്‍ വിജയിച്ച താരം 9 മത്സരങ്ങളില്‍ മാത്രമാണ് പരാജയമറിഞ്ഞത്.
Roger's off to the perfect start 👌
In his 1500th ATP match, @rogerfederer defeats Gojowczyk 6-2, 6-1 to kick off his Basel campaign in fine & fantastic fashion 👏
🎥: @TennisTV | #SwissIndoorsBasel pic.twitter.com/41j5n58mc6
— ATP Tour (@atptour) October 21, 2019
കഴിഞ്ഞ 12 തവണയും ടൂര്‍ണമെന്റിന്റെ ഫൈനല്‍ കളിച്ച ഫെഡറര്‍, ഈ സീസണില്‍ ദുബായ്, മിയാമി, ഹാലെ എന്നിവിടങ്ങളില്‍ കിരീടം സ്വന്തമാക്കിയിരുന്നു. റാഡു ആല്‍ബോട്ട്-ദുസാന്‍ ലജോവിച്ച് മത്സരത്തിലെ വിജയിയെയാണ് ഫെഡറര്‍ രണ്ടാം റൗണ്ടില്‍ നേരിടുക. 38കാരനായ ഫെഡറര്‍ കരിയറിലെ 103ാം കിരീടമാണ് ലക്ഷ്യമിടുന്നത്. നിലവിലെ ചാമ്പ്യനായ ഫെഡറര്‍ സ്വിസ് ഇന്‍ഡോറില്‍ മുന്‍പ് 9 തവണ ചാമ്പ്യനായിട്ടുണ്ട്.
