കൊല്ക്കത്ത: ഇന്ത്യന് ടീമിലേയ്ക്ക് ധോണി എത്തിയാലും ഇല്ലെങ്കിലും മറ്റൊരു റോളില് കളത്തിന് പുറത്ത് ഗ്യാലറിയില് തരംഗമാകുമെന്ന് സൂചന. ഇന്ത്യയും ബംഗ്ലാദേശും തമ്മില് ആരംഭിച്ചിരിക്കുന്ന പരമ്പരയിലാണ് ധോണി പുതിയകുപ്പായമണിയുക.ചരിത്രത്തിന്റെ ഭാഗമാകാന് പോകുന്ന ഇന്ത്യയുടെ പകല്-രാത്രി ആദ്യ ടെസ്റ്റ് മത്സരത്തിലാണ് ധോണി കമന്റേറ്ററുടെ റോളില് അവതരിക്കുക എന്നാണ് ദേശീയ മാധ്യമങ്ങള് സൂചിപ്പിക്കുന്നത്.
ചരിത്രത്തിന്റെ ഭാഗമാകാന് പോകുന്ന പകല്-രാത്രി ടെസ്റ്റ് മത്സരം കൊല്ക്കത്തയിലെ പ്രസിദ്ധമായ ഈഡന്ഗാര്ഡന്സിലാണ് നടക്കാന് പോകുന്നത്. ടെസ്റ്റ് വലിയ ആഘോഷമാക്കുന്നതിന്റെ ഭാഗമായി ഇന്ത്യക്കായി ടെസ്റ്റുകളില് ടീമിനെ നയിച്ച എല്ലാ നായകന്മാരെയും ആദരിക്കുന്ന ചടങ്ങാണ് ബിസിസിഐ പ്രസിഡന്റ് സൗരവ് ഗാംഗുലി തയ്യാറാക്കിയിരിക്കുന്നത്.
മറ്റൊരു പ്രത്യേകത ടീം ഇന്ത്യയുടെ നിലവിലെ കളിക്കാര്ക്കൊപ്പം മുന്കാല നായകന്മാരും ഗ്രൗണ്ടില് ദേശീയ ഗാനത്തിനായി അണിനിരക്കും.തുടര്ന്ന് കളി ആരംഭിക്കുമ്പോള് ഓരോ മുന് നായകന്മാരും കമന്ററി ബോക്സില് അതിഥികളായെത്തുമെന്നുമാണ് സൂചന.ഇന്ത്യാ- ബംഗ്ലാദേശ് പരമ്പരയിലെ രണ്ടാം ടെസ്റ്റാണ് കൊല്ക്കത്തയില് നിശ്ചയിച്ചിരിക്കുന്നത്. ഈ മാസം 22-ാം തീയതിയാണ് മത്സരം.
