ന്യൂഡൽഹി: ലോകകപ്പ് ഫുട്ബോൾ യോഗ്യതാ മത്സരങ്ങൾക്കുള്ള ഇന്ത്യൻ ടീമിനെ പ്രഖ്യാപിച്ചു. അഫ്ഗാനിസ്ഥാനും ഒമാനുമെതിരായ മത്സരങ്ങൾക്കുള്ള ടീമിനെയാണ് പ്രഖ്യാപിച്ചിരിക്കുന്നത്. മൂന്ന് മലയാളികൾ ടീമിൽ ഇടം പിടിച്ചപ്പോൾ യുവതാരം ധീരജ് സിംഗിനെ ഗോൾകീപ്പറായി ടീമിൽ ഉൾപ്പെടുത്തിയിട്ടുണ്ട്.
അണ്ടർ 17 ലോകകപ്പിൽ ഇന്ത്യൻ ഗോൾവല കാത്ത ധീരജ് കഴിഞ്ഞ ഐഎസ്എൽ സീസണിൽ കേരള ബ്ലാസ്റ്റേഴ്സ് താരമായിരുന്നു. നിലവിൽ എടികെ താരമാണ് ഈ 19 വയസുകാരൻ. സഹൽ അബ്ദുൾ സമദ്, അനസ് എടത്തൊടിക, ആഷിഖ് കുരുണിയൻ എന്നിവരാണ് ടീമിലെ മലയാളികൾ.
പരിക്കിന്റെ പിടിയിലായ ബ്ലാസ്റ്റേഴ്സ് താരം സന്ദേശ് ജിങ്കനെയും ഐഎസ്എല്ലിൽ പരിക്കേറ്റ ഒഡിഷ എഫ്സി താരം റൗളിൻ ബോർഗസിനെയും ടീമിൽ നിന്ന് ഒഴിവാക്കി. സെമിലെൻ ഡങ്കലും റെയ്നിയർ ഫെർണാണ്ടസും ടീമിൽ ഇടംപിടിച്ചു.
