ലണ്ടന്‍: യൂറോപ്പാ ലീഗിലെ ഗോള്‍ ക്ഷാമം തീര്‍ത്ത് മാഞ്ചസ്റ്റര്‍ യുണൈറ്റഡിന് മികച്ച ജയം. നാലാമത്തെ മത്സരത്തില്‍ പാര്‍ട്ടിസനെയാണ് യുണൈറ്റഡ് എതിരില്ലാത്ത മൂന്ന് ഗോളുകള്‍ക്ക് തകര്‍ത്തത്. ചുവപ്പന്‍ പടക്കായി മാസണ്‍ ഗ്രീന്‍വുഡ്, ആന്തോണീ മാര്‍ഷ്യല്‍, മാര്‍ക്കസ് റാഷ്ഫുഡ് എന്നിവരാണ് ഗോളടിച്ചത്.
സീസണിലെ ഗോള്‍ ക്ഷാമം തീര്‍ക്കുന്ന പ്രകടനത്തിലാണ് മാഞ്ചസ്റ്റര്‍ യുണൈറ്റഡ് സെര്‍ബിയയുടെ സ്റ്റാര്‍ ക്ലബ്ബായ പാര്‍ട്ടിസന്‍ ബെല്‍ഗ്രേഡിനെ തോല്പിച്ചത്. കളിയുടെ നിയന്ത്രണം മുഴുവന്‍ കൈയ്യിലാക്കിയ യുണൈറ്റഡ് ആദ്യ പകുതിയിലും രണ്ടാം പകുതിയുടെ തുടക്കത്തിലുമാണ് എതിരാളികളുടെ വലകുലുക്കിയത്.
കളിയുടെ 21-ാം മിനിറ്റിലാണ് മാഞ്ചസ്റ്ററിന്റെ ആദ്യഗോള്‍ പിറന്നത്. മാസണ്‍ ഗ്രീന്‍വുഡാണ് ഗോള്‍ നേടിയത്. തുടര്‍ന്ന് 33-ാം മിനിറ്റില്‍ അന്തോണി മാര്‍ഷ്യല്‍ രണ്ടാം ഗോള്‍ നേടി. മാര്‍ക്കസ് റാഷ്‌ഫോഡ് രണ്ടാം പകുതിയുടെ തുടക്കത്തില്‍ത്തന്നെ മൂന്നാം ഗോളും നേടി. രണ്ടാം ഗോള്‍ നേടിയപ്പോള്‍ത്തന്നെ ഗ്യാലറികളില്‍ ഗോള്‍ക്ഷാമം തീര്‍ത്തതിന്റെ സന്തോഷം ഇരമ്പി. വിജയത്തോടെ
യൂറോപ്പിലെ പ്രമുഖ ടീമുകളുടെ പോരാട്ടത്തില്‍ ഗ്രൂപ്പ് എല്ലില്‍ മാഞ്ചസ്റ്റര്‍ 4 കളികളിലായി 10 പോയിന്റോടെ മുന്നിലാണ്. ഞായറാഴ്ച ബ്രൈറ്റണിനെതിരെയാണ് ചെമ്പടയുടെ അടുത്ത കളി. ഗ്രൂപ്പില്‍ അല്‍ക്കമാര്‍, പര്‍ട്ടിസാന്‍, അസ്താനാ എന്നിവരാണ് മറ്റ് ടീമുകള്‍.
