ന്യൂഡല്ഹി: മുന് ഇന്ത്യന് നായകന് മഹേന്ദ്ര സിംഗ് ധോണി ട്വന്റി20 ലോകകപ്പ് ടീമിലുണ്ടാകുമോയെന്ന ചോദ്യത്തിന് വ്യക്തമായ മറുപടി നല്കി കോച്ച് രവി ശാസ്ത്രി. ഐപിഎല്ലില് കളിക്കുന്ന ധോണിയുടെ പ്രകടനം വിലയിരുത്തിയാകും ട്വന്റി20 ലോകകപ്പ് ടീമിനെ തെരഞ്ഞെടുക്കുകയെന്ന് രവി ശാസ്ത്രി പറഞ്ഞു.
ഐപിഎല്ലിലെ അദ്ദേഹത്തിന്റെ പ്രകടനത്തെ ആശ്രയിച്ചിരിക്കും ബാക്കിയുള്ള കാര്യങ്ങളെന്നാണ് ചോദ്യത്തിനുള്ള ഉത്തരമായി രവി ശാസ്ത്രി പറഞ്ഞത്. എന്നാല് ധോണിക്ക് പകരം ടീമില് പരിഗണിച്ചേക്കാവുന്ന മറ്റ് വിക്കറ്റ് കീപ്പര്മാരുടെ പ്രകടനവും നിര്ണ്ണായകമാകുമെന്ന് അദ്ദേഹം സൂചന നല്കി.
ഏകദിന ലോകകപ്പിന്റെ സെമി ഫൈനലില് ന്യൂസിലന്ഡിനെതിരായ മത്സരത്തിലാണ് ധോണി അവസാനമായി നീലക്കുപ്പായം അണിഞ്ഞത്. അടുത്ത വര്ഷം ഓസ്ട്രേലിയയിലാണ് ട്വന്റി20 ലോകകപ്പ് നടക്കുക. ഇതിനു മുന്നോടിയായി നടക്കുന്ന ഐപിഎല് ടൂര്ണമെന്റ് കളിക്കാര്ക്ക് നിര്ണ്ണായകമാകുമെന്നാണ് രവി ശാസ്ത്രി വ്യക്തമാക്കിയത്.
