തിരുവനന്തപുരം: ഡിസംബര് 1, ലോക എയ്ഡ്സ് ദിനം. എച്ച്ഐവി, എയ്ഡ്സിനെ കുറിച്ച് ജനങ്ങളില് അവബോധം ഉണ്ടാക്കുക എന്ന ലക്ഷ്യത്തോടെയാണ് ഡിസംബര് 1 ലോകാരോഗ്യ സംഘടന എയ്ഡ്സ് ദിനമായി ആചരിക്കുന്നത്. കൂട്ടായ്മകളിലൂടെ അതിജീവിക്കാം എന്ന സന്ദേശവുമായാണ് ഇക്കുറി എയ്ഡ്സ് ദിനം ആചരിക്കുന്നത്.
സംസ്ഥാനത്ത് പുതുതായി എയ്ഡ്സ് രോഗം ബാധിക്കുന്നവരുടെ എണ്ണം ഓരോ വര്ഷവും കുറഞ്ഞു വരുന്നതായാണ് റിപ്പോര്ട്ട്. സംസ്ഥാന എയ്ഡ്സ് കണ്ട്രോള് കണക്കെടുപ്പിലാണ് ഈ കണ്ടെത്തല്. പത്ത് വര്ഷം മുമ്പ് 2010-ല് 2342 പേരിലാണ് എച്ച്ഐവി കണ്ടെത്തിയത്. എന്നാല് ഈ വര്ഷം ഓക്ടോബര് വരെ ഇത് 985 ആയി കുറഞ്ഞു. കഴിഞ്ഞ വര്ഷം കണ്ടെത്തിയ രോഗികളും കുറവാണ്.
പത്ത് വര്ഷം മുമ്പ് രാജ്യത്ത് 2.40 ലക്ഷം പേരാണ് എച്ച്ഐവി പരിശോധനയ്ക്ക് വിധേയമായത്. ഏറ്റവും പുതിയ കണക്ക് പ്രകാരം 21.40 ലക്ഷം പേരാണ് എച്ചഐവി ബാധിതര്. ഇതില് 40 ശതമാനം സ്ത്രീകളാണ്. കേരളത്തില് 34,748 രോഗികളാണ് ഉള്ളത്.
പുതിയ രോഗികളുടെ എണ്ണം കുറയുന്നുണ്ടെങ്കിലും മാസം ശരാശരി 100 പേര്ക്കെങ്കിലും രോഗം കണ്ടെത്തുന്നുണ്ടെന്നാണ് സൂചന. 2030-ഓടെ എയ്ഡ്സ് രോഗികളെ പൂജ്യത്തിലെത്തിക്കുക എന്ന ലക്ഷ്യവുമായാണ് ലോകാരോഗ്യ സംഘടന മുന്നോട്ട് പോകുന്നത്.
