‘ഷമ്മി ഹീറോയാടാ, ഹീറോ’ മധു സി നാരായണൻ സംവിധാനം ചെയ്ത കുമ്പളങ്ങി നൈറ്റ്സിലെ ഈ ഡയലോഗ് മലയാളികൾക്ക് സുപരിചിതമാണ്. മുഹമ്മദ് ഷമി ടീം ഇന്ത്യയെ വിജയ തീരത്തെത്തിച്ചപ്പോഴെല്ലാം മലയാളികൾ ഈ ഡയലോഗ് ആഘോഷിക്കുകയും ചെയ്തു. എന്നാൽ സാക്ഷാൽ മുഹമ്മദ് ഷമി തന്നെ ഈ ഡയലോഗുമായി എത്തിയിരിക്കുകയാണ് ഇപ്പോൾ.
ന്യൂസിലൻഡിനെതിരായുള്ള മൂന്നാമത്തെ ട്വന്റി 20 യിൽ അവസാന ഓവർ എറിഞ്ഞത് ഷമിയായിരുന്നു. ഷമിയുടെ ഈ ഓവറായിരുന്നു മത്സരം സമനിലയിലാക്കിയതും. മത്സരത്തിന് ശേഷം ‘ഷമി ഹീറോയാടാ’ എന്ന് അദ്ദേഹം തന്നെ പറയുന്ന വീഡിയോയാണ് സാമൂഹിക മാദ്ധ്യമങ്ങളിലെ ഇപ്പോഴത്തെ ചർച്ചാ വിഷയം.
മലയാളി താരമായ സഞ്ജു വി സാംസണാണ് വീഡിയോ തന്റെ ഇൻസ്റ്റഗ്രാമിലൂടെ പങ്കുവച്ചിരിക്കുന്നത്. അതിനാൽ തന്നെ ഷമിയെ മലയാളം പഠിപ്പിച്ചതും സഞ്ജു തന്നെയെന്നുറപ്പ്. ടേബിള് ടെന്നീസ് കളിച്ചുകൊണ്ടിരിക്കെ ഷമി ഒരു ഷോട്ട് പായിച്ച ശേഷമാണ് ഈ വാചകം പറയുന്നത്. ഡയലോഗ് പറഞ്ഞതിന് ശേഷം സഞ്ജുവിനെ കെട്ടിപ്പിടിച്ചുകൊണ്ട് ഷമി ചിരിക്കുന്നുമുണ്ട്.
അവസാന ഓവറിൽ തകർപ്പൻ പ്രകടനം പുറത്തെടുത്ത മുഹമ്മദ് ഷമിയാണ് മത്സരം ഇന്ത്യയ്ക്ക് അനുകൂലമാക്കിയത്. അവസാന ഓവറിൽ 9 റൺസായിരുന്നു കിവീസിന് ജയിക്കാൻ ആവശ്യമായിരുന്നത്. ആദ്യ പന്ത് സിക്സർ പറത്തിയെങ്കിലും. പിന്നീട് രണ്ട് റൺസ് മാത്രമാണ് ഷമി വിട്ടുനൽകിയത്. ഒപ്പം രണ്ട് നിർണായക വിക്കറ്റുകളും ഷമി സ്വന്തമാക്കി.
പിന്നീട് നടന്ന സൂപ്പർ ഓവറിൽ ഇന്ത്യ ജയം നേടുകയും ചെയ്തു. ആദ്യം ബാറ്റ് ചെയ്ത കിവീസ് ഉയർത്തിയ 17 റൺസ് രാഹുലും രോഹിതും ചേർന്ന് അനായാസം മറികടക്കുകയായിരുന്നു. രോഹിത് രണ്ട് സിക്സ് അടക്കം നാല് പന്തിൽ 15 റൺസാണ് നേടിയത്. രാഹുൽ രണ്ട് പന്തിൽ നിന്ന് 5 റൺസും നേടി.
