പാരീസ് : ഫ്രഞ്ച് ലീഗിലെ മോണ്ട് പെല്ലിയര് ടീമിനെതിരെ കളിക്കുമ്പോള് വാരിയെല്ലിനേറ്റ പരിക്ക് ബ്രസീലിയന് താരം നെയ്മറിന് പിറന്നാളാഘോഷത്തിന് തടസ്സമായില്ല. ആട്ടവും പാട്ടുമായും നെയ്മര് രാത്രിമുഴുവന് തകര്ത്താടിയതാണ് വാര്ത്ത. ഇന്നലെ നെയ്മറുടെ 28-ാം പിറന്നാളായിരുന്നു. എന്നാല് പരിക്ക് ഭേദമായി ഉടന് ടീമിനൊപ്പം ചേരാനായി വിശ്രമിക്കേണ്ട താരത്തിന്റെ രീതിക്കെതിരെ പിഎസ്ജി പരിശീലകന് തോമസ് തൂച്ചെല് ശക്തമായി പ്രതികരിച്ചതും വാര്ത്തയായി.
നെയ്മറുടെ അഭാവത്തില് ലിയാന് എംബാപ്പെയാണ് കളത്തില് ടീമിന്റെ മുന്നേറ്റത്തിന് കുന്തമുനയാകേണ്ടത്. എന്നാല് കഴിഞ്ഞ കളിയില് കോച്ചുമായി എംബാപ്പെ നടത്തിയ ചൂടേറിയ വാക്കുതര്ക്കം കളിയെ എത്രകണ്ട് ബാധിക്കുമെന്നതാണ് ആരാധകര് ഉറ്റുനോക്കുന്നത്.
നെയ്മറുടെ ആഘോഷത്തില് മാര്ക്കോ വെറാറ്റി, എഡിസണ് കവാനി, ലയണ് ക്ലബ്ബിന്റെ ഡീപ്പേ തുടങ്ങിയ സൂപ്പര് താരങ്ങളും നിശാ വിരുന്നില് പങ്കെടുക്കാനെത്തി.