ഹാമില്ട്ടണ്: ന്യൂസിലന്ഡിനെതിരായ ആദ്യ ഏകദിനത്തില് പുതിയ റെക്കോര്ഡ് സ്വന്തമാക്കി ഇന്ത്യന് നായകന് വിരാട് കോഹ്ലി. ആദ്യം ബാറ്റ് ചെയ്ത ഇന്ത്യക്ക് കൂറ്റന് സ്കോര് സമ്മാനിച്ചതില് കോഹ്ലിയുടെ അര്ദ്ധ സെഞ്ച്വറി പ്രകടനം നിര്ണായകമായിരുന്നു. ഇതോടെ നായകനെന്ന നിലയില് ഏകദിനത്തില് ഏറ്റവുമധികം റണ്സെടുത്ത മൂന്നാമത്തെ ഇന്ത്യന് താരമെന്ന റെക്കോര്ഡിനാണ് കോഹ്ലി അര്ഹനായത്. മുന് ഇതിഹാസ താരവും നിലവിലെ ബിസിസിഐ പ്രസിഡന്റുമായ സൗരവ് ഗാംഗുലിയുടെ റെക്കോര്ഡാണ് കോഹ്ലി സ്വന്തം പേരില് കുറിച്ചത്.
നിലവില് 83 ഏകദിനങ്ങളില് നിന്നും കോഹ്ലി 5123 റണ്സ് നേടിക്കഴിഞ്ഞു. 142 ഏകദിനങ്ങളില് നിന്നും 5082 റണ്സെടുത്ത ഗാംഗുലി ഇതോടെ നാലാം സ്ഥാനത്തേക്കു പിന്തള്ളപ്പെട്ടു. 172 മത്സരങ്ങളില് നിന്നും 6641 റണ്സെടുത്ത മഹേന്ദ്ര സിംഗ് ധോണിയാണ് പട്ടികയില് ഓന്നാമതുള്ളത്. 162 ഏകദിനങ്ങളില് നിന്നും 5239 റണ്സെടുത്ത മുഹമ്മദ് അസ്ഹറുദ്ദീനാണ് രണ്ടാംസ്ഥാനത്ത്.
ന്യൂസിലന്ഡിനെതിരെ 63 പന്തില് ആറു ബൗണ്ടറികളോടെ 51 റണ്സാണ് കോഹ്ലി നേടിയത്. ഒരു ഘട്ടത്തില് രണ്ടിന് 54 റണ്സെന്ന നിലയില് ഇന്ത്യ പതറിയെങ്കിലും മൂന്നാം വിക്കറ്റില് ശ്രേയസ് അയ്യരുമായി ചേര്ന്നുണ്ടാക്കിയ സെഞ്ച്വറി കൂട്ടുകെട്ടാണ് ഇന്ത്യക്ക് മികച്ച സ്കോറിലേക്കുള്ള അടിത്തറയൊരുക്കിയത്.
