ചാമ്പ്യന്സ് ലീഗ് മത്സരങ്ങള് നടക്കാനിരിക്കെ നിലവിലെ ചാമ്പ്യന്മാരായ ലിവര്പൂള് കിരീടം നിലനിര്ത്തില്ലെന്ന് പ്രവചിച്ച് സൂപ്പര് കമ്പ്യൂട്ടര്. ഫൈവ് തേര്ട്ടി എയ്റ്റ് എന്ന വെബ്സൈറ്റ് ആണ് ചാമ്പ്യന്സ് ലീഗില് നടക്കാനിരിക്കുന്ന മത്സര ഫലങ്ങള് പ്രവചിച്ചത്. ലിവര്പൂള് ഈ സീസണില് ചാമ്പ്യന്സ് ലീഗ് നില നിര്ത്താന് സാധ്യത കുറവാണെന്നാണ് സൂപ്പര് കമ്പ്യൂട്ടര് പ്രവചിക്കുന്നത്.
കണക്കുകള് പ്രകാരം ലിവര്പൂള് ചാമ്പ്യന്സ് ലീഗ് നേടാന് 20% മാത്രമേ സാധ്യതയുള്ളൂ. എന്നാല് ജര്മനിയിലെ വമ്പന് ടീമായ ബയേണ് മ്യൂണിക്കിന് ചാമ്പ്യന്സ് ലീഗ് നേടാന് 21% സാധ്യതയുണ്ട്. നിലവിലെ പ്രീമിയര് ലീഗ് ജേതാക്കളായ മാഞ്ചസ്റ്റര് സിറ്റിക്ക് 16% സാധ്യതയും പിഎസ്ജിക്ക് 11% സാധ്യതയുമാണ് ഉള്ളത്. സ്പാനിഷ് ലീഗിലെ വമ്പന്മാരായ ബാഴ്സലോണ, റയല് മാഡ്രിഡ് എന്നീ ടീമുകള്ക്ക് 8%, 6% എന്നിങ്ങനെയാണ് ചാമ്പ്യന്സ് ലീഗ് കിരീടം നേടാനുള്ള സാധ്യത.
ചാമ്പ്യന്സ് ലീഗിലെ അടുത്ത ഘട്ട മത്സരങ്ങള് ഫെബ്രുവരി 19ന് തുടങ്ങും. അത്ലറ്റിക്കോ മാഡ്രിഡ് ലിവര്പൂളിനെ നേരിടുമ്പോള് ബൊറൂസിയ ഡോര്ട്മുണ്ട് പിഎസ്ജിയെ നേരിടും. ഫെബ്രുവരി 26ന് ചെല്സി-ബയേണ് പോരാട്ടം നടക്കും. 27നാണ് ആരാധകര് ഏറെ പ്രതീക്ഷയോടെ കാത്തിരിക്കുന്ന മാഞ്ചസ്റ്റര് സിറ്റി-റയല് മാഡ്രിഡ് പോരാട്ടം നടക്കുക.
