റോം: കൊറോണ വൈറസ് ഏറ്റവുമധികം നാശംവിതച്ച ഇറ്റലിയില്‍ വൈറസിന്റെ വ്യാപനം വര്‍ദ്ധിക്കുന്നതില്‍ ഒരു ചാമ്പ്യന്‍സ് ലീഗ് മത്സരവും കാരണമായെന്ന് റിപ്പോര്‍ട്ട്.് അറ്റ്‌ലാന്റയും വലന്‍സിയയും തമ്മില്‍ നടന്ന ചാമ്പ്യന്‍സ് ലീഗ് മത്സരം വൈറസ് വ്യാപനത്തില്‍ പ്രധാന പങ്കു വഹിച്ചെന്ന് ഇറ്റലിയിലുള്ള ഒരു ഇമ്മ്യൂണോളജിസ്റ്റ് പറയുന്നു. ഇറ്റലിയിലെ തന്നെ വിവിധ മാദ്ധ്യമങ്ങളും ഇക്കാര്യം റിപ്പോര്‍ട്ടു ചെയ്തിട്ടുണ്ട്.
സാന്‍ സിറോയില്‍ വച്ചു നടന്ന ചാമ്പ്യന്‍സ് ലീഗിന്റെ ആദ്യ പാദ പ്രീ ക്വാര്‍ട്ടറില്‍ അറ്റ്‌ലാന്റ ഒന്നിനെതിരെ നാലു ഗോളുകള്‍ക്ക് വിജയിച്ചിരുന്നു. മത്സരം അന്ന് അടച്ചിട്ട സ്‌റ്റേഡിയത്തിലാണു നടന്നത്. എങ്കിലും സ്‌റ്റേഡിയത്തിനു പുറത്ത് ആരാധകര്‍ വലിയ രീതിയില്‍ തടിച്ചു കൂടിയിരുന്നു. ഇത് വൈറസ് ബാധ രാജ്യത്താകെ വ്യാപിക്കാന്‍ കാരണമായെന്നാണ് റിപ്പോര്‍ട്ടില്‍ പറയുന്നത്.
അറ്റ്‌ലാന്റയുടെ എല്ലാ മത്സരങ്ങളും ആരാധകരുടെ ആവേശം കൊണ്ട് ശ്രദ്ധേയമാണ്. അന്നത്തെ മത്സരത്തിനായി ബെര്‍ഗാമോയില്‍ നിന്നും നാല്‍പതിനായിരത്തോളം ആരാധകരാണ് മിലാനിലെത്തിയത്. മത്സരം അടച്ചിട്ട സ്റ്റേഡിയത്തിലാണ് നടന്നതെങ്കിലും ഇവരെല്ലാം സ്‌റ്റേഡിയത്തിനു പുറത്ത് ആര്‍പ്പു വിളികളുമായി ഉണ്ടായിരുന്നു.
വൈറസ് ബാധയുടെ ആദ്യ ഘട്ടത്തില്‍ ഇത്രയധികം പേര്‍ ഒരു സ്ഥലത്തു നിന്നും മറ്റൊരിടത്തേക്കു യാത്ര ചെയ്തതു മൂലമാണ് ഇറ്റലിയിലെ ലൊംബാര്‍ഡിയില്‍ വൈറസ് വ്യാപിക്കാന്‍ കാരണമായതെന്നാണ് റിപ്പോര്‍ട്ടുകള്‍ പറയുന്നത്. അറ്റ്‌ലാന്റ സ്ഥിതി ചെയ്യുന്ന ബെര്‍ഗോമോയും ലൊംബാര്‍ഡിയുമാണ് ഇറ്റലിയില്‍ ഏറ്റവുമധികം മരണം റിപ്പോര്‍ട്ടു ചെയ്ത സ്ഥലങ്ങളെന്നതും ശ്രദ്ധേയമാണ്.
