ലണ്ടന്: ഇംഗ്ലീഷ് പ്രീമിയര് ലീഗ് ഫുട്ബോള് താരങ്ങള്ക്ക് നിര്ദ്ദേശം നല്കി ബ്രിട്ടീഷ് ആരോഗ്യവകുപ്പ് സെക്രട്ടറി. രാജ്യം നേരിട്ടുകൊണ്ടിരിക്കുന്ന കൊറോണ ബാധയെ അതിജീവിക്കാന് എല്ലാ പ്രീമിയര്താരങ്ങളും വേതനത്തിന്റെ ഒരു പങ്ക് നിര്ബ ന്ധമായും നല്കണമെന്നാണ് നിര്ദ്ദേശം. സെക്രട്ടറി മാറ്റ് ഹാന്കോക്കാണ് നിര്ദ്ദേശം പുറപ്പെടുവിച്ചത്.
പ്രീമിയര് ലീഗുമായി ബന്ധപ്പെട്ട എല്ലാ ക്ലബ്ബുകളിലെ ജീവനക്കാരും അവരുടെ വിഹിതം നല്കിയെങ്കിലും കായികതാരങ്ങള് നല്കിയിരുന്നില്ല. ഇത് ശ്രദ്ധയില്പെട്ടതോടെയാണ് സെക്രട്ടറി നേരിട്ട് പ്രസ്താവന ഇറക്കിയത്.കായിക വകുപ്പിന് പകരം ആരോഗ്യവകുപ്പ് നേരിട്ട് കാര്യം പറഞ്ഞത് വിഷയത്തിന്റെ ഗൗരവം വര്ധിപ്പിക്കുന്നതായി പ്രീമിയര് ലീഗ് സംഘാ ടകര് പറഞ്ഞു. ചില പ്രമുഖ താരങ്ങള് അവരുടെ വന്തുകകള് സംഭാവന നല്കി മാതൃക കാണിച്ചതിനേയും ഹാന്കോക്ക് പ്രശംസിക്കാന് മറന്നില്ല.
‘ നിരവധി പേര് വലിയ ത്യാഗമാണ് ചെയ്യുന്നത്. അതിന്റെ ഒരു ഭാഗം ചെയ്യാന് പ്രീമിയര് ലീഗിലെ കളിക്കാരും തയ്യാറാകണം’ സെക്രട്ടറിയുടെ പ്രസ്താവനയക്ക് പിന്നാലെ ഇംഗ്ലണ്ടിലെ പ്രൊഫഷണല് ഫുട്ബോള് അസോസിയേഷനും താരങ്ങളോട് രാജ്യം നേരിടുന്ന സാമ്പത്തിക പ്രതിസന്ധി പരിഹരിക്കാന് ഒപ്പം നില്ക്കണമെന്ന ആഹ്വാനവുമായി രംഗത്തെത്തി.
ബ്രിട്ടനിലെ കൊറോണ ബാധിതരായി മരിച്ചവരുടെ നിരക്ക് 2921 ആയതിന് ശേഷമുള്ള വാര്ത്താക്കുറിപ്പിലാണ് ഫുട്ബോള് രംഗത്തെ പ്രത്യേകം പരാമര്ശിച്ചത്. നിലവില് ടോട്ടനം, ന്യൂകാസില്, ബേണ്മൗത്ത്, നോര്വിച്ച് എന്നീ ക്ലബ്ബുകള് ഭരണകൂടവുമായി സഹകരിച്ചു കഴിഞ്ഞു. ബര്മിംഗ്ഹാം സിറ്റി താരങ്ങള് അവരുടെ വേതനത്തിന്റെ പകുതിയാണ് അടുത്ത നാലുമാസത്തേക്ക് വേണ്ടെന്ന് വച്ചിരിക്കുന്നത്.
മറ്റ് യൂറോപ്പ്യന് ലീഗുകളില് സ്പെയിനിലെ ക്ലബ്ബുകളായ ബാഴ്സലോണയുടേയും അത്ലറ്റികോ മാഡ്രിഡിലേയും കളിക്കാര് അവരുടെ മാസവേതനത്തിന്റെ 70 ശതമാനം കൊറോണ പ്രതിരോധത്തിനായി സമര്പ്പിച്ചു കഴിഞ്ഞു.
