കറാച്ചി: ലോകോത്തര ഫാസ്റ്റ് ബൗളറായി പാകിസ്ഥാന്റെ ഷൊഐബ് അക്തര് മാറാന് കാരണക്കാരന് ജഗ് മോഹന് ഡാല്മിയയാണെന്ന് പാകിസ്ഥാന് ക്രിക്കറ്റ് ബോര്ഡ്. അന്താരാഷ്ട്ര ക്രിക്കറ്റില് അക്തറുടെ ബൗളിംഗ് ആക്ഷനെകുറിച്ചുള്ള സംശയത്തിന്റെ പേരില് കരിയര് തന്നെ ഇല്ലാതാകുമായിരുന്നു. ഡാല്മിയ ഒറ്റക്കാണ് അത് നേരിട്ടതെന്ന് നന്ദിയോടെ പാകിസ്ഥാന് ക്രിക്കറ്റ് ബോര്ഡ് അംഗവും 1999 മുതല് 2003 വരെ പിസിബി മേധാവിയുമായിരുന്ന ത്വാഖിര് സിയ സ്മരിക്കുന്നു.
2000-2001 സീസണില് അക്തറുടെ ബൗളിംഗ് അണ്ടര് ആം ത്രോ വരുന്നുവെന്ന അവകാശവാദമാണ് മറ്റ് യൂറോപ്പ്യന് ക്രിക്കറ്റ് ബോര്ഡുകളുയര്ത്തിയത്. അന്ന് ഐസിസി മേധാവിയായി ഡാല്മിയ ഇരുന്നതാണ് അക്തറിന് രക്ഷയായത്. ചെറുപ്രായത്തിലെ ചികിത്സകാരണം തോളിന്റെ ഭാഗത്തുണ്ടായ മാറ്റമാണ് പന്തെറിയുന്നതിലുള്ള കൈയ്യുടെ ചലനമെന്നും മനപ്പൂര്വ്വമായ ആക്ഷനല്ലെന്നും ഡാല്മിയ സ്ഥാപിച്ചു.
2003ല് ലോകകപ്പിന്റെ സമയത്ത് പാകിസ്ഥാന് ടീമിനകത്തെ പടലപ്പിണക്കം പലതാരങ്ങളുടേയും പ്രകടനം മോശമാക്കിയെന്ന ആരോപണവും സിയ ഉന്നയിച്ചു. അന്നത്തെ ലോകോത്തര താരങ്ങളായ വസിം അക്രം, വഖാര് യൂനസ്, സയ്യദ് അന്വര് എന്നിവരെ അടിയന്തിരമായി ടീമില് നിന്നും ലോകകപ്പ് കഴിഞ്ഞയുടനെ മാറ്റണമെന്ന ആവശ്യവും താനാണ് ശക്തമായി മുന്നോട്ട് വച്ചതെന്നും സിയ ഒരു അന്താരാഷ്ട്ര കായിക മാദ്ധ്യമത്തിന് നല്കിയ അഭിമുഖത്തില് വ്യക്തമാക്കി. വഖാര് യൂനസ് നയിച്ച ടീം എല്ലാ സാധ്യതയു ണ്ടായിട്ടും ദക്ഷിണാഫ്രിക്കയിലും സിംബാബ്വേയിലുമായി നടന്ന ലോകകപ്പില് അവസാന ആറുസ്ഥാനത്തുപോലും എത്താതെ പുറത്താവുകയായിരുന്നുവെന്നും സിയ കുറ്റപ്പെടുത്തി.
