ന്യൂഡല്ഹി: ഫുട്ബോള് രംഗത്ത് കഴിയുന്നത്ര കാലം തുടരുമെന്ന് സുനില് ഛേത്രി. അന്താരാഷ്ട്ര ഫുട്ബോള് മതിയാക്കുന്നുവെന്ന പ്രചാരണത്തിന് തടയിട്ടുകൊണ്ടാണ് ഛേത്രിയുടെ മറുപടി. ‘ ഞാന് നിലവിലെ ഫുട്ബോള് രംഗം ഏറെ ആസ്വദിക്കുകയാണ്. ഉടനെയൊന്നും എവിടേക്കും പോകുന്നുമില്ല’ ഇന്ത്യക്കായി 100 ലേറെ അന്താരാഷ്ട്ര മത്സരം കളിച്ച് റെക്കോഡ് സൃഷ്ടിച്ച ഛേത്രി പറഞ്ഞു. അന്താരാഷ്ട്ര ഫുട്ബോളില് അരങ്ങേറ്റംകുറിച്ചിട്ട് ഇന്നേക്ക് ഛേത്രിയ്ക്ക് 15 വയസ്സ് തികയുകയാണ്.
താന് ഇനിയും കുറഞ്ഞത് നാലുവര്ഷമെങ്കിലും കളിച്ചിട്ടേ പിന്മാറാന് ഉദ്ദേശിക്കുന്നുള്ളു. എന്റെ ശാരീരിക ക്ഷമതയ്ക്ക് നിലവില് ഒരു പ്രശ്നവുമില്ലെന്നും 35 വയസ്സുകാരനായ ഛേത്രി പറഞ്ഞു. ഇന്ത്യക്കായി ഏറ്റവുമധിക മത്സരങ്ങള് കളിച്ച താരമെന്ന നിലയിലും ഏറ്റവും കൂടുതല് ഗോളുകള് നേടി മെസ്സിയെപോലും മറികടന്ന താരമാണ് ഛേത്രി.
നിലവിലെ ഇന്ത്യന് ലീഗ് മത്സരങ്ങളില് ബാംഗ്ലൂര് എഫ്.സിയുടെ പകരംവയ്ക്കാനില്ലാത്ത താരമാണ് ഛേത്രി. ഫുട്ബോളില് കുറഞ്ഞത് 20 വര്ഷം കളിക്കാന് ആഗ്രഹിക്കുന്നുവെന്നാണ് ഛേത്രിയുടെ ശക്തമായ നിലപാട്. നിലവില് 115 മത്സരങ്ങളിലായി 72 ഗോളുകളാണ് ഛേത്രി നേടിയിരിക്കുന്നത്. അന്താരാഷ്ട്ര ടൂര്ണ്ണമെന്റുകളില് ഏറ്റവും അധികം ഗോളുകള് നേടുന്ന താരങ്ങളില് ഛേത്രിയ്ക്ക് മുന്നിലുള്ളത് ക്രിസ്റ്റിയാനോ റൊണാള്ഡോയും ലയണല് മെസ്സിയും മാത്രമാണ്.
