മാഡ്രിഡ്: സ്പാനിഷ് ലീഗില് റയല് മാഡ്രിഡിന് മികച്ച വിജയം. വലന്സിയയെ എതിരില്ലാത്ത മൂന്ന് ഗോളുകള്ക്കാണ് റയല് തോല്പ്പിച്ചത്. കരീം ബെന്സേമയുടെ ഇരട്ടഗോളുകളുടെ മികവിലാണ് റയല് ജയം നേടിയത്. ജയത്തോടെ റയല് ലീഗിലെ ഒന്നാം സ്ഥാനക്കാരായ ബാഴ്സലോണയുമായി കേവലം രണ്ടുപോയിന്റുകള് മാത്രം വ്യത്യാസത്തിലേക്ക് എത്തിയിരിക്കുകയാണ്.
കളിയുടെ രണ്ടാം പകുതിയിലാണ് മൂന്നു ഗോളുകളും വീണത്. ബെന്സേമ 61,86 മിനിറ്റുകളിലാണ് വലന്സിയയുടെ വല ചലിപ്പിച്ചത്. തുടര്ന്ന് 74-ാം മിനിറ്റില് അസെന്സിയേയും റയലിനായി ഗോള് നേടി. പകരക്കാരനായി ഇറങ്ങിയാണ് അസെന്സിയോ ഗോള് നേടിയത്. ഇഡന് ഹസാഡാണ് ബെന്സേമയുടെ ആദ്യഗോളിന് വഴിയൊരുക്കിയത്. രണ്ടാം ഗോള് മികച്ച വോളിയിലൂടെയാണ് ബെന്സേമ സ്വയം വലയിലെത്തിച്ചത്. അസെന്സിയോയുടെ ഗോളിന് വഴിതെളിച്ചത് ഫെര്ലാന്റ് മെന്ഡി നല്കിയ മികച്ച പാസ്സായിരുന്നു.
ഇരട്ടഗോള് നേട്ടത്തോടെ ബെന്സേമ ക്ലബ്ബിന് വേണ്ടി 243 ഗോളുകള് നേടുന്ന താരമായി മാറി. ഫെറന്സ് പുസ്കാസിന്റെ നേട്ടമാണ് ബെന്സേമ മറികടന്നത്. ടീമിനായി ഏറ്റവുമധികം ഗോള് നേടിയ അഞ്ചാമത്തെ താരമാണ് ബെന്സേമ. 450 ഗോളുകള് വാരിക്കൂട്ടിയ നിലവില് യുവന്റസിലേക്ക് പോയ ക്രിസ്റ്റിയാനോ റൊണാള്ഡോയാണ് ഒന്നാമന്.
