ഭോപ്പാല്‍: ഉത്തര്‍പ്രദേശിലെ ഗുണ്ടാത്തലവന്‍ വികാസ് ദുബെയെ പിടികൂടിയ മധ്യപ്രദേശ് പോലീസിനെ സംസ്ഥാന ആഭ്യന്തര മന്ത്രി അഭിനന്ദിച്ചു. എട്ടു പോലുസുകാരെ ദാരുണമായി കൊലപ്പെടുത്തിയ കൊടും കുറ്റവാളി വികാസിനെ മധ്യപ്രദേശ് പോലീസ് ഉജ്ജയിനിയില്‍ വച്ചാണ് പിടികൂടിയത്. അതിക്രൂരനായ ഈ ഗുണ്ടാത്തലവനെ പിടികൂടി ഉത്തര്‍പ്രദേശിനെ സഹായിച്ച എല്ലാ പോലീസുദ്യോഗസ്ഥരും അഭിനന്ദനം അര്‍ഹിക്കുന്നവെന്ന് മധ്യപ്രദേശ് ആഭ്യന്തര മന്ത്രി നരോത്തം മിശ്ര പറഞ്ഞു.
ഉത്തര്‍പ്രദേശ് സംഭവത്തിന് ശേഷം സമീപത്തെ എല്ലാ സംസ്ഥാനങ്ങളും വളരെ ജാഗ്രതയിലായിരുന്നു. മധ്യപ്രദേശ് പോലീസ് സുപ്രധാന നഗരങ്ങളില്‍ പുതുതായി എത്തുന്ന എല്ലാവരേയും തിരയുകയായിരുന്നു. ഇതിനൊപ്പം മുഴുവന്‍ ക്രിമിനല്‍ പശ്ചാത്തലമുള്ളവരുടെ ഫോണ്‍വിളികളും പോലീസ് കൃത്യമായി ശ്രദ്ധിച്ചുകൊണ്ടിരുന്നു. കൊറോണ കാലമായ തിനാല്‍ ഹോട്ടലുകളില്‍ തിരക്കില്ലാത്തതും റൂം എടുക്കുന്നവരെ കണ്ടെത്താന്‍ എളുപ്പമാണെന്നതും പോലീസിന് ഗുണമായെന്നും ആഭ്യന്തര മന്ത്രി പറഞ്ഞു.
ഉജ്ജയിനിയിലെ പ്രസിദ്ധ തീര്‍ത്ഥാടന കേന്ദ്രമായ മഹാകാലേശ്വര ക്ഷേത്ര ദര്‍ശനത്തിനായി എത്തിയപ്പോഴാണ് പോലീസ് വികാസിനെ പിടികൂടിയത്. പിടികൂടിയ സമയത്ത് തുടക്കത്തില്‍ പേരു വെളിപ്പെടുത്താതിരുന്ന വികാസ് പിന്നീട് താനാണ് വികാസ് ദുബെയെന്ന് വെളിപ്പെടുത്തിയതായും മന്ത്രി നരോത്തം മിശ്ര പറഞ്ഞു.
