ബെയ്ജിംഗ് : ടിക് ടോകിന്റെ ആസ്ഥാനം ലണ്ടനിലേക്ക് പറിച്ചു നടാന്‍ ഒരുങ്ങി മാതൃകമ്പനിയായ ബൈറ്റ് ഡാന്‍സ്. ടിക് ടോകിന്റെ ആസ്ഥാനം ലണ്ടനിലേക്ക് മാറ്റാന്‍ അധികൃതര്‍ തീരുമാനിച്ചതായാണ് വിവരം. അതേ സമയം ഇതുമായി ബന്ധപ്പെട്ട ഔദ്യോഗിക സ്ഥിരീകരണം ലഭ്യമായിട്ടില്ല.
നേരത്തെ ആസ്ഥാനം ചൈനയില്‍ നിന്നും മാറ്റാന്‍ ബൈറ്റ് ഡാന്‍സ് ആലോചിക്കുന്നതായുള്ള റിപ്പോര്‍ട്ടുകള്‍ പുറത്തു വന്നിരുന്നു. ഇതിന് പിന്നാലെയാണ് ആസ്ഥാനം ലണ്ടനിലേക്ക് മാറ്റാന്‍ തീരുമാനിച്ചതായുള്ള വിവരം പുറത്തുവരുന്നത്. ലണ്ടന്‍ കൂടാതെ രണ്ട് രാജ്യങ്ങള്‍ കൂടി ബൈറ്റ് ഡാന്‍സിന്റെ പരിഗണനയില്‍ ഉണ്ടെന്നാണ് റിപ്പോര്‍ട്ടുകള്‍. ആസ്ഥാനം സ്ഥാപിക്കുന്നതുമായി ബന്ധപ്പെട്ട ലണ്ടന്‍ സര്‍ക്കാരുമായി കമ്പനി ചര്‍ച്ചകള്‍ നടത്തുകയാണ്. ഇതിന് ശേഷമാകും ഔദ്യോഗിക പ്രഖ്യാപനം ഉണ്ടാകുക.
ലഡാക്കിലെ ചൈനീസ് പ്രകോപനത്തിന് പിന്നാലെ ടിക് ടോക് ഉള്‍പ്പെടെ 59 ചൈനീസ് ആപ്പുകള്‍ക്ക് കേന്ദ്ര സര്‍ക്കാര്‍ നിരോധം ഏര്‍പ്പെടുത്തിയത് ബൈറ്റ് ഡാന്‍സ് ഉള്‍പ്പെടെ നിരവധി ഇന്റര്‍നെറ്റ് കമ്പനികളെയാണ് പ്രതിസന്ധിയില്‍ ആക്കിയത്. ഇന്ത്യക്ക് പിന്നാലെ അമേരിക്കയും ആസ്‌ട്രേലിയയും ടിക് ടോകിന് നിരോധനം ഏര്‍പ്പെടുത്താന്‍ തീരുമാനിച്ചതായുള്ള വിവരങ്ങള്‍ പുറത്തു വന്നതോടെയാണ് ചൈനയുമായി അകലം പാലിക്കാന്‍ ബൈറ്റ് ഡാന്‍സ് തീരുമാനിച്ചത്. വരും വര്‍ഷങ്ങളില്‍ ചൈനയുമായുള്ള എല്ലാ ബന്ധങ്ങളും ബൈറ്റ് ഡാന്‍സ് ഉപേക്ഷിക്കുമെന്നാണ് സൂചനകള്‍.
