സാന്ഫ്രാന്സിസ്കോ: കൊറോണ വൈറസ് വ്യാപനത്തിന്റെ പശ്ചാത്തലത്തില് ജീവനക്കാര്ക്ക് 2021 ജൂലൈ വരെ വര്ക്ക് ഫ്രം ഹോം അനുവദിച്ച് ഗൂഗിള്. ജനുവരി അവസാനം വരെയായിരുന്നു നേരത്തെ ഗൂഗിള് വര്ക്ക് ഫ്രം ഹോം അനുവദിച്ചിരുന്നത്. ഓഫീസില് വരേണ്ട ആവശ്യമില്ലാത്ത ചുമതലകളിലുള്ളവര്ക്കാണ് വര്ക്ക് ഫ്രം ഹോമില് തുടരാന് ഗൂഗിള് അനുവാദം നല്കിയിരിക്കുന്നത്. രണ്ടു ലക്ഷത്തോളം ഗൂഗിള് ജീവനക്കാര് ഇത് വഴി വര്ക്ക് ഫ്രം ഹോമില് തുടരും.
കൊറോണ വൈറസ് വ്യാപനം വര്ധിക്കുന്ന സാഹചര്യത്തില് ജോലിസ്ഥലത്തേക്ക് തിരികെ പ്രവേശിക്കുന്നതില് ജീവനക്കാര്ക്ക് ആശങ്ക നിലനില്ക്കുന്ന സാഹചര്യത്തിലാണ് കമ്പനിയുടെ മുന്കരുതല് നടപടി. കൊറോണ വ്യാപനം കണക്കിലെടുത്ത് ട്വിറ്ററും തങ്ങളുടെ ജീവനക്കാര്ക്ക് വര്ക്ക് ഫ്രം ഹോം അനുവദിച്ചിട്ടുണ്ട്. അതേസമയം ഘട്ടം ഘട്ടമായി ഓഫീസുകളുടെ പ്രവര്ത്തനം പുനരാരംഭിക്കാനുള്ള ശ്രമത്തിലാണ് പല ടെക്നോളജി സ്ഥാപനങ്ങളും.