സിഡ്നി: ഇംഗ്ലണ്ടിന്റെ സൂപ്പര് ഓള്റൗണ്ടര്ക്ക് പ്രശംസയുമായി ഓസ്ട്രേലിയയുടെ മുന്നായകനും ലോകോത്തര ബാറ്റ്സ്മാനുമായ സ്റ്റീവ് സ്മിത്ത്. അങ്ങനെയൊരു താരത്തെ ഏതൊരു ക്യാപ്റ്റനും തന്റെ ടീമിലാഗ്രഹിക്കും. ഏതു കളിയും ജയിപ്പിക്കുന്ന മികച്ച ഓള്റൗണ്ടറാണ് അയാൾ. വരാനിരിക്കുന്ന ഐ.പി.എല്ലില് അയാൾ തകര്പ്പന് പ്രകടനം പുറത്തെടുക്കുമെന്ന പ്രതീക്ഷയിലാണ് സ്മിത്ത്.ഇംഗ്ലീഷ് താരം ബെൻസ്റ്റോക്സിനെക്കുറിച്ചാണ് സ്മിത്ത് ഇങ്ങനെ പറഞ്ഞത്. വെസ്റ്റിന്ഡീസിനെതിരായ പരമ്പര തിരിച്ചുപിടിച്ച ബെന് സ്റ്റോക്സ് അത്യുജ്ജ്വല പ്രകടനമാണ് പുറത്തെടുത്തത്. സെഞ്ച്വറി നേട്ടവും വിക്കറ്റുകളും വീഴ്ത്തിയാണ് സ്റ്റോക്സ് കരീബിയന് നിരയെ തകര്ത്തത്.
ഇംഗ്ലണ്ടിന്റെ മികച്ച നിരയ്ക്കെതിരെ ഏറ്റവും ഗുണനിലവാരമുള്ള പരമ്പരകള് കളിക്കണമെന്നാണ് ആഗ്രഹം. സ്റ്റോക്സിനേയും ജോഫ്രാ ആര്ച്ചറിനേയും ജോസ് ബട്ലറേയും നേരിടുക എന്നത് എന്നും വെല്ലുവിളിയാണെന്നും സ്മിത്ത് പറഞ്ഞു. ഓരോ കളി കളിയുമ്പോഴും ശക്തനായി മാറിക്കൊണ്ടിരിക്കുന്ന സ്റ്റോക്സാണ് ലോകതാരം. ഈ സീസണിലെ ആദ്യ അന്താരാഷ്ട്ര മത്സരം ഇംഗ്ലണ്ടിനെതിരെ കളിക്കാന് തയ്യാറെടുക്കുന്ന ഓസ്ട്രേലിയയ്ക്കായി മികച്ച പ്രകടനം പുറത്തെടുക്കുമെന്നും സ്മിത്ത് വ്യക്തമാക്കി.