മുളകിട്ട് വച്ച കറി കഴിക്കാത്തവർ കാണില്ലലോ….എന്നാൽ ഇന്ന് ഒരു സ്പെഷ്യൽ കറിയാണ് . അതെ, പച്ച മീൻ കൊണ്ട് മാത്രമല്ല നല്ല ഉണക്ക മീനും നമ്മുക്ക് മുളകിട്ട് കറി വയ്ക്കാം. ഉണക്കിയ ചെമ്മീൻ ആണെങ്കിൽ പിന്നെ സംഗതി വേറെ ലെവലാകും എന്നതിൽ സംശയമില്ല. നമ്മുക്ക് ഉണക്ക ചെമ്മീൻ മുളകിട്ടത് ഉണ്ടാക്കുന്ന വിധം എങ്ങനെ ആണെന്ന് നോക്കാം…
പാചകത്തിനായി വേണ്ടി വരുന്ന ചേരുവകൾ
ഉണക്ക ചെമ്മീൻ കഴുകി വൃത്തിയാക്കിയത് – ഒരു പിടി
സവാള നേരിയതായി അരിഞ്ഞത് – 1 (വലുത്)
വെളുത്തുള്ളി അല്ലികൾ തൊലി കളഞ്ഞു മുഴുവനോടെ – 8-10 എണ്ണം
മുളക് പൊടി – 2-3 ടീസ്പൂൺ
കാശ്മീരി മുളക് പൊടി – 1-2 ടീസ്പൂൺ
വാളൻ പുളി കുഴമ്പു രൂപത്തിൽ – ഒരു വലിയ നെല്ലിക്ക വലുപ്പത്തിൽ
തേങ്ങാ തിരുമ്മിയത് – 1/2 കപ്പ്
അപ്പോൾ ഇനി തയ്യാറാക്കുന്ന വിധത്തിലേയ്ക്ക് കടക്കാം…
ചട്ടിയിൽ എണ്ണ ചൂടാക്കി അതിലേക്ക് വെളുത്തുള്ളി അല്ലികൾ (മുഴുവനോടെ) ഇട്ടു ചെറുതായി മൂപ്പിക്കുക. നിറം മാറി തുടങ്ങുമ്പോൾ സവാള ചേർക്കാം. സവാളയുടെ നിറം മാറിത്തുടങ്ങുമ്പോൾ ഇതിലേക്ക് മുളകുപൊടികൾ ചേർത്ത് നന്നായി വഴറ്റുക.
ഇനി ഇതിലേക്ക് പുളി വെള്ളം ചേർത്ത് നന്നായി തിളപ്പിക്കുക. അടുത്തതായി ഉണക്ക ചെമ്മീൻ ചേർത്ത് കൂടെ ഗ്രേവിക്കു ആവശ്യമായ വെള്ളവും ചേർത്ത് തിളപ്പിക്കുക. ഉപ്പു ചേർക്കാം. തിളച്ചു വരുമ്പോൾ തേങ്ങാ ചേർക്കാം അരയ്ക്കേണ്ടതില്ല , എല്ലാം വെന്തു കുറുകി വരുമ്പോൾ വാങ്ങി വെയ്ക്കാം. അല്പം വെളിച്ചെണ്ണ മീതെ ഒഴിക്കാം.