ഗ്രാനഡില്ല അഥവാ കൃഷ്ണ ഫൽ എന്നറിയപ്പെടുന്ന പാഷൻ ഫ്രൂട്ട് , ബ്രസീൽ, അർജന്റീന തുടങ്ങിയ രാജ്യങ്ങളിൽ നിന്നും നമ്മുടെ നാട്ടിലേക്ക് കുടിയേറ്റപെട്ട ഒരുതരം വള്ളിച്ചെടിയാണ് . പാസ്സിഫ്ലോറ എന്ന ശാസ്ത്ര നാമത്തിൽ അറിയപ്പെടുന്ന അഞ്ഞൂറിൽ പരം വർഗ്ഗങ്ങളുള്ള വള്ളിച്ചെടിയായ പാഷൻ ഫ്രൂട്ടിനു അതിന്റെ നാമം ലഭിച്ചത് , ഈ ചെടികളിൽ ഉണ്ടാകുന്ന പുഷ്പങ്ങൾ അറിയപ്പെടുന്നത് പാഷൻ പുഷ്പങ്ങൾ എന്നായത് കൊണ്ടാണ് . നല്ല സുഗന്ധവും , മധുരവും പുളിയും ചേർന്ന രുചിയുമുള്ള പാഷൻ ഫ്രൂട്ട് ,പർപ്പിൾ , മഞ്ഞ , സ്വർണ്ണം എന്നീ നിറങ്ങളിലും ‘കാവേരി ” എന്നറിയപ്പെടുന്ന സങ്കരയിനത്തിലും ലഭ്യമാണ് .
ഉഷ്ണമേഖല പ്രദേശങ്ങളിൽ കൂടുതലായി കണ്ടുവരുന്ന സസ്യമായതിനാൽ , ഇന്ത്യയിൽ വാണിജ്യാവശ്യങ്ങൾക്കായി പാഷൻ ഫ്രൂട്ട് കൃഷി ചെയ്യുന്നത് നീലഗിരി കുന്നുകളിലും , മിസോറാം , മണിപ്പൂർ , മേഘാലയ തുടങ്ങിയ പ്രദേശങ്ങളിലുമാണ് . കട്ടിയുള്ള പുറംതോടിനുള്ളിൽ , കൊഴുത്ത ദ്രാവകത്തിനുള്ളിൽ ചെറിയ ചെറിയ വിത്തുകൾ ആയി ഉണ്ടാകുന്ന ഈ ഫലത്തിന് ധാരാളം ഗുണങ്ങളുണ്ട് .
ധാരാളം നാരുകൾ അടങ്ങുകയും ഗ്ലൈസെമിക് സൂചിക കുറഞ്ഞ അളവിനുമായതിനാൽ , പാഷൻ ഫ്രൂട്ട് കഴിക്കുന്നത് പ്രമേഹരോഗികളിൽ ഇൻസുലിന്റെ അളവ് നിയന്ത്രിച്ചു നിർത്താനും , വയർ നിറഞ്ഞ പ്രതീതി ജനിപ്പിക്കുന്നതിനാൽ ധാരാളം കലോറി അടങ്ങിയ ഭക്ഷണ വസ്തുക്കൾ കഴിക്കാതിരിക്കാൻ സഹായിക്കുകയും ചെയ്യും .
ചർമ്മ സംരക്ഷണത്തിന് ആന്റിഓക്സിഡന്റുകൾ വളരെയധികം ഫലപ്രദമാണ് എന്നുള്ളത് വസ്തുതാപരമായ കാര്യമാണ് . അതിനാൽ തന്നെ വിറ്റാമിൻ എ , വിറ്റാമിൻ സി , റിബോഫ്ളാവിൻ , കരോട്ടീൻ തുടങ്ങിയ ആന്റിഓക്സിഡന്റുകൾ അടങ്ങിയിരിക്കുന്ന പാഷൻ ഫ്രൂട്ട് കഴിക്കുന്നത് , ചർമ്മത്തിന്റെ കോശങ്ങളുടെ ചെറുപ്പം നിലനിർത്താനും , മാർദ്ദവം കാത്തു സൂക്ഷിക്കാനും സഹായിക്കും .
പാഷൻ ഫ്രൂട്ടിൽ അടങ്ങിയിരിക്കുന്ന വിറ്റാമിൻ സിയും ആൽഫ കരോട്ടീനും രോഗ പ്രതിരോധശേഷി വർധിപ്പിക്കുകയും , ഇരുമ്പ് സത്ത് അടങ്ങിയിരിക്കുന്നതിനാൽ രക്തത്തിൽ ഹീമോഗ്ലോബിന്റെ അളവ് കൂട്ടാൻ സഹായിക്കുകയും ചെയ്യുന്നു .
പാഷൻ ഫ്രൂട്ടിൽ അടങ്ങിയിരിക്കുന്ന റിബോഫ്ളാവിൻ , നിയാസിൻ തുടങ്ങിയ വിറ്റാമിനുകൾ നമ്മുടെ ശരീരത്തിലെ തൈറോയ്ഡ് ഗ്രന്ഥികളുടെ പ്രവർത്തനത്തെ സഹായിക്കുന്നു . കൂടാതെ ഹൃദയത്തിലേക്കുള്ള രക്തധമനികൾ കട്ടിയാകുന്നത് ഒരു പരിധി വരെ തടയുന്നത് മൂലം ഹൃദയത്തിന്റെ പ്രവർത്തനം സുഗമമായി നടക്കാനും സഹായിക്കുന്നു .
പാഷൻ ഫ്രൂട്ടിൽ മഗ്നീഷ്യം, കാൽസ്യം, ഇരുമ്പ് ,ഫോസ്ഫറസ്, പൊട്ടാസ്യം, സോഡിയം തുടങ്ങിയ ധാതുക്കൾ അടങ്ങിയിരിക്കുന്നതിനാൽ ,ഇവ അസ്ഥികളുടെ സാന്ദ്രത നിലനിർത്തുകയും ഓസ്റ്റിയോപൊറോസിസ് തുടങ്ങിയ രോഗങ്ങളെ തടയുന്നതിനും സഹായിക്കുന്നു.
നമ്മുടെ നിത്യാഹാരത്തിന്റെ ഭാഗമായി പാഷൻ ഫ്രൂട്ടിനെ തനതായ രീതിയിൽ കഴിക്കുകയോ , ജ്യൂസ് , സ്ക്വാഷ് , ജാം എന്ന രീതിയിൽ രൂപപെടുത്തിയോ ഉൾപെടുത്തുന്നത് ആരോഗ്യദായകമാണ് .
